Թուրքիան սկսել է բետոնե պատ կառուցել Սիրիայի հետ սահմանին

PanARMENIAN.Net - Թուրքիան սկսել է 45 կմ երկարությամբ բետոնե պատ կառուցել Սիրիայի հետ սահմանին, հայտնել է Associated Press-ը թուրքական ԶԼՄ-ների վրա հղումով: Ռեյհանլիում արդեն 12-կիլոմետրանոց պատնեշ է տեղադրվել, հայտնել է Dogan գործակալությունը: Պաշտոնատար անձինք չեն մեկնաբանում բետոնե պատի կառուցումը, հայտնում է Pravda.ru-ն:

Սիրիայի հետ սահմանին մոդուլային պատ կառուցելու մասին որոշումը թուրքական իշխանությունները կայացրեցին Սուրուչում հուլիսի 20-ի ահաբեկչությունից հետո: Մոդուլային պատը կունենա 150 կմ երկարություն, այն հարմար է նրանով, որ կարելի է հեշտությամբ հավաքել և հետո ապամոնտաժել`ցանկացած տեղում տեղադրելով: Որոշ հատվածներում փշալար կտեղադրվի:

Իրավիճակը Թուրքիայում սրվեց հուլիսի 20-ի ահաբեկչությունից հետո, որին 32 մարդ զոհ գնաց Սիրիային սահմանակից Սուրուչ քաղաքում:

Հուլիսի 20-ին պայթյուն որոտաց Շանլիուրֆա նահանգի Սիրիայի հետ սահմանին գտվող Սուրուչ քաղաքի Ամարա մշակութային կենտրոնի մոտ գտնվող թեյարանում, որի պատասխանատվությունը դրվեց «Իսլամական պետության» վրա: 32 մարդ զոհվեց, 100-ից ավելին` վիրավորվեցին: Ըստ ոստիկանության տվյալների, ահաբեկչական գործողությունը 18-ամյա մահապարտ աղջիկ է իրականացրել, որը գործի է դրել պայթուցիկ սարքը: Այս շենքում է բնակվում մոտ 300 երիտասարդ, որոնք ներկայացնում են Սոցիալիստների երիտասարդական ընկերակցությունների դաշինքը: Պայթյունը որոտացել է այդ կազմակերպության անդամների ելույթի ժամանակ, որոնք մտադիր էին հայտարարել մամուլին, որ մեկնելու են վերականգնելու սիրիական Կոբանի քաղաքը, որը մի քանի ամիս մնաց «Իսլամական պետության» գրոհայինների հսկողության տակ:

Թուրքիան հուլիսի 24-ին ռազմական գործողություն է սկսել Սիրիայում ԻՊ գրոհայինների և Հյուսիսային Իրաքում Թուրքիայում արգելված Քրդստանի աշխատավորական կուսակցության (ՔԱԿ) գրոհայինների դեմ: «Հուլիսի 24-ին արդյունավետ ավիահարվածներ են հասցվել ՔԱԿ ահաբեկչական կազմակերպության դիրքերին Իրաքի հյուսիսում: Ոչնչացվել են գրոհայինների ճամբարներն և զենքի պահեստներ: Գրոհի են ենթարկվել նաև ԻՊ դիրքերը Սիրիայի հյուսիսում»,-ասվում է Թուրքիայի կառավարության հայտարարության մեջ: Հուլիսի 29-ին պայթեցվեց Քիրկուկ-Յումուրթալիկ նավթամուղը, որով Թուրքիա էր առաքվում իրաքյան նավթը: Պայթեցվել է նաև Իրան-Թուրքիա գազամուղը, որը Թուրքիայի իշխանությունները սաբոտաժ են համարում: Քուրդ գրոհայինները հարձակումներ են իրականացրել ոստիկանության բաժանմունքների վրա Էրզրումում, Մուշում, Վանում: Կան զոհեր: