Instagram-ում հայտնվել են 30 վայրկյան տևողությամբ գովազդային հոլովակներ

9 սեպտեմբերի 2015 - 18:08 AMT

PanARMENIAN.Net - Լուսանկարների և տեսագրությունների փոխանակման համար նախատեսված Instagram հավելվածը թույլ է տալիս գործարարներին տեղադրել իրենց ընկերության գովազդը 30 վայրկյան տևողությամբ գովազդային հոլովակների տեսքով։ Ընդ որում, գովազդային նյութը կցուցադրվի ինչպես ավանդական քառակուսի, այնպես էլ տեսանյութի ուղղանկյուն ֆորմատով։ Ցանցի օգտատերերը նախկինի նման սահմանափակված են 15 վայրկյան տևողությամբ քառակուսի տեսանյութերով։

Այսպիսով, գովազդային հոլովակների տեղադրման փորձերը, որոնք շարունակվում էին մի քանի ամիս, հաջողությամբ ավարտվեցին, և համակարգը ներդրվեց ծառայության մեջ։ Ներկայումս գովազդը հասանելի է 30 երկրներում, սակայն սեպտեմբերի վերջին ամբողջ աշխարհով ընկերությունները կկարողանան հոլովակներ տեղադրել։

Բացի այդ, գովազդատուների համար հասանելի է Marquee ծառայությունը, որը թույլ կտա կարճ ժամանակում ձեռք բերել առավելագույն լայն լսարան։ Այս ծառայությունից արդեն օգտվել է Fox հեռուստաընկերությունը՝ նոր՝ Scream Queens հեռուստասերիալի գովազդի համար։ Հավելվածում կհայտնվի նաև ծառայություն, որը թույլ կտա օգտատերերին փոխազդել գովազդային կոնտենտի հետ․դա «Գնել», «Տեղադրել» և նմանատիպ այլ կոճակներն են։ Գովազդը հնարավոր է կառավարել Facebook, Ads API ինտեֆեյսերի և Power Editor-ի միջոցով։

Instagram հավելվածում ավելացել է գործառույթ, որը թույլ է տալիս լուսանկարներն ուղարկել անձնական հաղորդագրությունների միջոցով նորությունների շարքից կամ ուրիշի պրոֆիլից: Այսպիսով, անձնական հաղորդագրությունները հավելվածի ներսում վերածվել են մեսենջերի:

Ընդ որում, Direct ներդիրի հաղորդագրությունները փոխել են խմբավորման սկզբունքը` այժմ դրանք հավաքվում են ըստ զրուցակիցների, ոչ թե լուսանկարների: Այսպիսով, այժմ նույն մարդու հետ բոլոր լուսանկարներն ու անձնական հաղորդագրությունները կհայտնվեն նույն երկխոսության մեջ: Բացի այդ, նամակագրության էկրանին ավելացել է էմոդզիներով ստեղնաշար և տեսախցիկի գործարկման համար նախատեսված կոճակ:

Ժապավենից լուսանկար ուղարկելու համար հարկավոր է սեղմել սլաքով կոճակը, որը գտնվում է լայքի և մեկնաբանության պատկերակների հարևանությամբ: Այդպես են ուղարկվում Direct նաև հեշթեգներն ու գեոթեգերը: Դրանից հետո կհայտնվի երկխոսություն ընտրելու պատուհանը: Եթե խոսակցությանը մի քանի հոգի է մասնակցում, այն կարելի է վերանվանել: Օրիգինալ պոստը կբացվի նամակագրության մեջ լուսանկարը սեղմելու դեպքում: Սակայն եթե լուսանկարը ուղարկվի փակ աքաունթից, այն կտեսնեն միայն զրույցի այն մասնակիցները, որոնք լուսանկարի հեղինակի բաժանորդներն են:

Նախկինում թարմացումների ժապավենից կամ այլ պրոֆիլից լուսանկարով կիսվելու համար հարկ էր լինում մեկնաբանության մեջ ավելացնել այդ մարդու նիքնեյմը «@» նիշի միջոցով: Գործառույթի գործարկման պահին որևէ մեկի հիշատակումը «@» նիշի միջոցով առկա էր մեկնաբանությունների 40%-ում:

Անձնական հաղորդագրությունները հայտնվեցին Instagram-ում 2013-ի դեկտեմբերին: Գործառույթի գործարկումից հետո ԶԼՄ-ները սկսեցին գրել, որ այն այնքան էլ մեծ տարածում չի ստանում: Այժմ հեղինակները հայտնում են, որ հավելվածի 300 մլն օգտատերերից անձնական հաղորդագրություն է ուղարկել 85 մլն աքաունթից: Թարմացումը հասանելի է iOS և Android-ի համար նախատեսված հավելվածների 7.5 տարբերակից: Instagram-ը սոցիալական ցանցի տարրերով անվճար հավելված է լուսանկարների և տեսանյութերի փոխանակման համար։ Այն թույլ է տալիս լուսա և տեսանկարահանել, օգտագործել տարբեր ֆիլտրեր, ինչպես նաև տարածել դրանք սեփական ծառայության կամ մի շարք այլ սոցիալական ցանցերի միջոցով։ Instagram-ի լուսանկարները քառակուսի են, ինչպես Polaroid, Kodak Instamatic ակնթարթային լուսանկարչության և 6×6 միջին ֆորմատի ֆոտոխցիկների դեպքում։

2012թ. ապրիլին Instagram-ը գնվել է Facebook ընկերության կողմից։ Արժեքը կազմել է 300 մլն դոլար գումարային միջոցներով և ընկերության 23 մլն բաժնետոմս, ինչն ընդհանուր առմամբ կազմել է 1 մլրդ դոլար:

Հղումներ թեմայով.

Instagram: Open to Businesses of All Sizes, Everywhere