Բաքուն դատի է տալիս պետական France 2-ին, որն Ալիևին բռնակալ ու բռնապետ է անվանել

10 սեպտեմբերի 2015 - 17:23 AMT

PanARMENIAN.Net - Ադրբեջանի ղեկավարությունը պատրաստվում է դատի տալ ֆրանսիական պետական France 2 հեռուստաալիքը: Պատճառը լրագրողական հետաքննությունը եթեր հեռարձակելն է, որտեղ Ադրբեջանը բնութագրվում է որպես «բռնապետություն», իսկ դրա ղեկավար Իլհամ Ալիևը՝ «բռնակալ»: Այդ մասին սեպտեմբերի 9-ին Ադրբեջանի ղեկավարության ֆրանսիացի փաստաբան Օլիվյե Պրադոյին հղումով տեղեկացրել է France-Presse գործակալությունը:

«Լրագրողներ Էլիզ Լյուսեն ու Լորան Ռիշարը հաղորդման ամենասկզբից Ադրբեջանն աշխարհում որպես ամենախիստ բռնապետություններից են ներկայացնում»,- ասել է Պրադոն:

Սեպտեմբերի 8-ին France 2-ն իր Cash Investigation հետախուզական շաբաթական հաղորդման շրջանակում ռեպորտաժ է հեռարձակել՝ նվիրված Ֆրանսիայի նախագահ Ֆրանսուա Օլանդի՝ 2014-ի գարնանը Ադրբեջան այցին:

Ադրբեջանում նկարահանումներից հետո ֆրանսիացի լրագրողներից առգրավել էին նկարահանված նյութերը, մասնավորապես՝ ընդդիմադիր ակտիվիստների ու իրավապաշտպանների հետ հարցազրույցները:

«Ամբողջ հաղորդման ընթացքում առանց որևէ ապացույցի ադրբեջանական առաջնորդին անհիմն որպես կովկասյան «բռնակալ» ու «բռնապետ» են ներկայացնում»,- հայտարարել է փաստաբանը:

Ըստ Ru.rfi.fr-ի, նա նաև հավելել է, որ Ադրբեջանն «այլևս չի պատրաստվում հանդուրժել ու դատի կտա նրանց, ով զրպարտում է երկիրը»:

Հղումներ թեմայով.

Ru.rfi.fr: Азербайджан подаст в суд на французский телеканал France 2