Երկրորդ Մատենադարանը կբացվի Արցախում մինչև հոկտեմբերի վերջ

PanARMENIAN.Net - ԼՂՀ-ում արդեն պատրաստ է հայկական երկրորդ Մատենադարանի շենքը, և այն Գանձասարի վանքի հարակից տարածքում կբացվի մինչև հոկտեմբերի վերջ: Այս մասին տեղեկացրել է Արցախում Մատենադարանի շենքի կառուցման հովանավոր, «Փյունիկ» մարդկային ռեսուրսների զարգացման համահայկական հիմնադրամի տնօրեն Գաբրեիլ Ջամբարջին (Ջամբարջյան), նշելով, որ բացման օրվա մասին կհայտարարվի նախօրոք:

Նախաձեռնելով Արցախում հայկական երկրորդ Մատենադարանի հիմնումը` «Փյունիկ» հիմնադրամը նպատակ է ունեցել հայկական հնագույն բնակավայրում հավաքել և ցուցադրել Երևանի Մեսրոպ Մաշտոցի անվան Մատենադարան-ինստիտուտում պահված բոլոր ձեռագրերը, որոնք ստեղծվել են Արցախում, մասնավորապես` Գանձասար վանական համալիրում, որը եղել է հայկական հնագույն գրչության կենտրոններից:

«Պատահական չէ ընտրված վայրը` Գանձասարը, որտեղ կառուցվել է շենքը և որտեղ գործելու է Մատենադարանը», - ասել է Ջամբարջին՝ հավելելով, որ դարավոր պատմություն ունեցող այդ համալիրում հայկական կարևորագույն նման կենտրոնի բացումը և նույն կենտրոնում ստեղծված հնագույն ձեռագրերի ցուցադրումը ևս մեկ անգամ աշխարհին ապացուցելու է, որ Արցախը հայկական հող է, գրում է Arevelk.am-ը:

«Փյունիկ» հիմնադրամը Գանձասարի Մատենադարանի շինարարության համար հատկացրել է 269 մլն. դրամ, ինչպես նաև հիմնադրամի տնօրենը նշել է, որ «Փյունիկը» պատրաստ է հետագայում նաև բոլոր միջոցներով աջակցել Մատենադարանի աշխատանքներին:

Գանձասարի Մատենադարանի ճարտարապետական աշխատանքների խորհրդատուն Արթուր Մեսչյանն է եղել, փորձ է արվել որոշ նմանություններ պահպանել Երևանի Մատենադարանի համալիրի ճարտարապետությանը: