Շվեյցարահայ համայնքի ներկայացուցիչ.ՄԻԵԴ-ը իրավունք չուներ Շվեյցարիայի օրենսդրությունն իր հայեցողությամբ սահմանել

PanARMENIAN.Net - Շվեյցարիա-Հայաստան ընկերակցության նախագահ Սարգիս Շահինյանը՝ (ՄԻԵԴ-ում «Փերինչեքն ընդդեմ Շվեյցարիայի» գործով Շվեյցարիայի տեսակետը պաշտպանող կազմակերպությունը) անդրադառնալով Փերինչեքի գործով ՄԻԵԴ-ի վճռին` նշել է, որ դատարանն իրավունք չուներ Շվեյցարիայի ներքին օրենսդրությունն իր հայեցողությամբ սահմանել:

Շվեյցարիայի օրենսդրությունը սահմանում է քրեական պատասխանատվություն Հայոց ցեղասպանության ժխտման համար:

Նա նաև նշել է, որ ակնհայտ է, որ Շվեյցարիայի օրենսդրությունը չի շարունակելու կիրառվել այնպես, ինչպես նախկինում: Եվ հիմա շվեյցարական օրենսդիր մարմինը պետք է այս հարցում իր խոսքն ասի:

Մարդու իրավունքների Եվրոպական դատարանը հոկտեմբերի 15-ին որոշում ընդունեց «Դողու Փերինչեքն ընդդեմ Շվեյցարիայի» գործով: Դատարանը եզրակացրել է, որ Շվեյցարիան խախտել է Փերինչեքի՝ ազատ խոսքի իրավունքը: Որոշումը վերջնական է ու ենթակա չէ վերանայման:

«Դատարանի գիտելիքները իրավական և սոցիալական հիմքի վրա շատ թույլ էին: Նույն հողի վրա չդնել այն, որ Հայոց ցեղասպանության ժխտողականությունը ատելության հրահրման ենթակա առարկա է, ամենածանր արդյունքներից մեկն է, որը մեզ հասկանալ է տալիս, թե մենք ինչ իրականության մեջ ենք գտնվում», - ասել է Շահինյանը, մեջբերում է Tert.am-ը:

Շահինյանը նկատել է, որ Ֆրանսիայում օրենսդրություն չկա, որ պաշտպանի հայոց արժանապատվությունը Ցեղասպանության ժխտողականությունից:

Նա չի մեկնաբանել վճռի պատճառները:

Եվրոպական դատարանը Փերինչեքի գործով վճիչը կայացրել է դատավորների 1 0 կողմ և 7 դեմ ձայնի հարաբերակցությամբ:

«Ժողովրդավար հասարակությունում հայկական համայնքի շահերը պաշտպանելու համար Փերինչեքին քրեական պատասխանատվության ենթարկել անհրաժեշտ չէր», - ասվում է որոշման մեջ:

«Անհերքելի է, որ Փերինչեքի պատիժն ու դատապարտումը և Շվեյցարիայի հայկական ասոցիացիային հատուցում վճարելու որոշումը նրա ազատ կամարտահայտման իրավունքի խախտում էր», - նշվում է վճռում:

Թուրք ազգայնական քաղաքական գործիչ, Թուրքիայի Աշխատավորական կուսակցության ղեկավար Դողու Փերինչեքը 2005-ի մայիս, հուլիս և սեպտեմբեր ամիսներին Շվեյցարիայում մասնակցելով տարբեր կոնֆերանսների ժխտել էր 1915-ին և դրանից հետո Օսմանյան կայսրության կողմից հայերի նկատմամբ իրականացված ցեղասպանության պատմական փաստը:Մասնավորապես, իր ելույթներում Փերինչեքը Հայոց ցեղասպանությունն անվանել է «միջազգային սուտ»:

2007-ի մարտի 9-ին շվեյցարական դատարանը Քրեական օրենսգրքի 216-րդ հոդվածով դատապարտել էր թուրք ազգայնական, «Աշխատավորական կուսակցության» ղեկավար Դողու Փերինչեքին՝ ինչպես ֆինանսական, այնպես էլ քրեական պատասխանատվության ենթարկելով Հայոց ցեղասպանությունը ժխտելու համար: Վուդի կանտոնի վերաքննիչ դատարանը և Դաշնային գերագույն դատարանը մերժել էին մարտի 9-ի դատավճռի դեմ ներկայացված բողոքը: Շվեյցարիայի դատարանների դատավճիռներում նշված է, որ Հայոց ցեղասպանությունը, ինչպես հրեաների Հոլոքոստը, ապացուցված պատմական փաստ է, որը ճանաչված է երկրի օրենսդիր մարմնի կողմից:

Հունվարի 28-ին Մարդու իրավունքների եվրոպական դատարանում սկսվել էր «Փերինչեքն ընդդեմ Շվեյցարիայի» գործով դատավարությունը, որի վերաբերյալ 2013-ի դեկտեմբերի 17-ի վճիռը բողոքարկվել էր Շվեյցարիայի կողմից, իսկ 2014-ի հունիսի 2-ին դատարանը որոշեց գործը վերաքննել դատարանի Մեծ պալատում:

2014-ի մարտի 14-ին Հայաստանի նախագահ Սերժ Սարգսյանը ողջունեց Շվեյցարիայի կառավարության` «Փերինչեքն ընդդեմ Շվեյցարիայի» գործով Մարդու իրավունքների եվրոպական դատարանի (ՄԻԵԴ)՝ 2013-ի դեկտեմբերի 17-ի վճիռը բողոքարկելու որոշումը: Նրա խոսքով, Շվեյցարիան միշտ էլ միջազգային ասպարեզում մարդու իրավունքների ակտիվ պաշտպաններից մեկն էր, ռասայական խտրական վերաբերմունքի դեմ պայքարում ամենաակտիվ կառավարություններից մեկը, այլատյացություն սերմանող կառույցների, մարդկանց, ընդհանրապես երևույթի դեմ պայքարող ամենաակտիվ կառավարություններից մեկը: