Մեծ Բրիտանիան կարող է կրկին միանալ ԻՊ դեմ ռազմական գործողություններին

PanARMENIAN.Net - Փարիզի ահաբեկչություններից հետո Մեծ Բրիտանիան պետք է նորից մտածի Սիրիայում «Իսլամական պետության» (ԻՊ) դեմ ռազմական գործողություններին մասնակցելու մասին: Այդ մասին հայտարարել է Միացյալ Թագավորության պաշտպանության նախարար Մայքլ Ֆելոնը BBC-ի եթերում:

Ֆրանսիայի մայրաքաղաք Փարիզում նոյեմբերի 13-ի երեկոյան 7 ահաբեկչական հարձակում է իրականացվել։ Ըստ վերջին տվյալների, «Բատակլան» թատրոնում, «Ստադ դե Ֆրանս» ստադիոնի մոտակայքում ու Փարիզի ևս 5 այլ կետում միաժամանակյա հարձակումների ընթացքում զոհվել է 129 մարդ։ Երկրում նախագահի հրամանով ատրակարգ դրություն է հայտարարված:

«Ֆրանսիայի պայքարը մեր պայքարն է, այդ ահաբեկչությունները կատարվել են մեզնից երկու ժամվա հեռավորության վրա՝ մեր դռների մոտ: Մենք պետք է վերանայենք բոլոր տարբերակները, թե ինչպես կարող ենք միանալ այդ պայքարին», - ասել է Ֆելոնը, հայտնում է «Ազատություն» ռադիոկայանը:

Օրերս Լոնդոնում մասամբ տարհանվեց Գեթվիք օդանավակայանը: Դրա պատճառն ահաբեկչության վտանգն է: Հյուսիսային տերմինալում ուղևորների մոտ կասկածելի իր է8 հայտնաբերվել: Ենթադրվում է, որ ուղևորները փորձել են զենքով օդանավ նստել: Նախնական տվյալներով կա ձերբակալված կասկածյալ: Գեթվիքը Մեծ Բրիտանիայի երկրորդ խոշոր օդանավակայանն է:

2013 թվականին Մեծ Բրիտանիայի խորհրդարանը դեմ քվեարկեց Սիրիայում Միացյալ Թագավորության ռազմական միջամտությանը: