ԼՂՀ ՊՆ. Հրադադարի ռեժիմը խախտվել է տարբեր տրամաչափի զինատեսակներից

PanARMENIAN.Net - ՊԲ օպերատիվ տվյալների համաձայն նոյեմբերի 19-ի լույս 20-ի գիշերը ղարաբաղա-ադրբեջանական հակամարտ զորքերի շփման գծում հակառակորդի կողմից հրադադարի պահպանման ռեժիմը խախտվել է մոտ 70 անգամ, որի ընթացքում տարբեր տրամաչափի զինատեսակներից, այդ թվում նաև 60 մմ-ոց ականանետերից (3 արկ), հայ դիրքապահների ուղղությամբ արձակվել է ավելի քան 900 կրակոց:

ՊԲ առաջապահ ստորաբաժանումների կողմից ձեռնարկված համապատասխան գործողությունների արդյունքում հակառակորդի ակտիվությունը ճնշվել է: Շփման գծի ողջ երկայնքով հայ դիրքապահները շարունակում են վստահորեն իրականացնել իրենց առջև դրված մարտական խնդիրները, հայտնում է ԼՂՀ ՊՆ մամուլի ծառայությունը:

ԵԱՀԿ ՄԽ ամերիկացի համանախագահն անդրադարձել է միջնորդների ամերիկյան հանդիպումներին: «ԵԱՀԿ Մինսկի խմբի համանախագահները հիանալի հանդիպում են ունեցել Նյու Յորքում և Վաշինգտոնում: Մենք շարունակում ենք միասնաբար կատարել մեր աշխատանքը որպես ղարաբաղյան հակամարտության խաղաղ կարգավորման միջնորդներ»,-գրել է ԵԱՀԿ ՄԽ ամերիկացի համանախագահ Ջեյմս Ուորլիքը Twitter-ում:

Նոյեմբերի 18-ին և լույս 19-ի գիշերը հրադադարի պահպանման ռեժիմը խախտվել է մոտ 65 անգամ, որի ընթացքում, տարբեր տրամաչափի հրաձգային զինատեսակներից, հայ դիրքապահների ուղղությամբ արձակվել է ավելի քան 900 կրակոց:

Նոյեմբերի 17-ին և լույս 18-ի գիշերը նկատվել է հրադադարի պահպանման ռեժիմի խախտումների նվազում: Նշված ժամանակահատվածում շփման գծում հրադադարի պահպանման ռեժիմը խախտվել է մոտ 35 անգամ, որի ընթացքում, տարբեր տրամաչափի հրաձգային զինատեսակներից, ինչպես նաև ՀԱՆ-17 տիպի նռնականետից, հայ դիրքապահների ուղղությամբ արձակվել է ավելի քան 500 կրակոց: