Թուրքիան դժվարացրել է ՌԴ նավերի անցումը Բոսֆորի նեղուցով

PanARMENIAN.Net - Նոյեմբերի 29-ի առավոտից ռուսական դրոշով նավերի համար բարդություններ են առաջացել Բոսֆորի նեղուցն անցնելիս, որը միացնում է Սև ծովն ու Մարմարա ծովը: Այդ մասին հայտնել է ՌԴ Տրանսպորտային ռազմավարությունների կենտրոնը:

Ըստ marinetraffic.com համակարգի, որն առցանց հետևում է նավերի ընթացքին, նոյեմբերի 29-ին ռուսական նավերը զիգզագներով և շրջապտույտներով են ընթացել` երկար սպասելով նեղուց մտնելու թույլտվության, հայտնում է Korrespondent-ը:

Այլ երկրների նավերի ընթացքը սովորականից չի տարբերվել: Ավելի ուշ` նոյեմբերի 29-ի երեկոյան ռուսական նավերն այնուամենայնիվ մտել են Բոսոֆոր:

Նշվում է, որ «Բրատսկ» նավը սպասել է առավոտյան ժամը 10:00-ից մինչև երեկոյան ժամը 19:00-n: «Վոլգոմարտի» շեղումները սկսվել են գիշերվա ժամը 3-ին և շարունակվել են մինչև 17:00-ն:

Ռուսաստանն իր հերթին լրացուցիչ հսկողություն կսահմանի նավահանգիստներում Սու-24-ի խոցումից հետո Թուրքիայի հետ հարաբերությունների վատթարացման պատճառով, հայտնում է Gazeta.ru-ն: Այդ մասին հայտարարել է Ռուսաստանի առաջին փոխվարչապետ Իգոր Շուվալովը:

Ըստ նրա, առաջին հերթին այդպիսի միջոցներ կձեռնարկվեն Ղրիմում և Ազովի ու Սև ծովի ավազաններում: «Նավահանգիստներում լրացուցիչ հսկողություն կսահմանվի: Այդ աշխատանքներն արդեն սկսվել են, առաջին հերթին դա վերաբերում է Ղրիմին և Ազովի ու Սև ծովի ավազաններին` հաշվի առնելով աշխարհագրորեն Թուրքիային մոտ լինելը»,-ասել է Շուվալովը:

ՌԴ նախագահ Վլադիմիր Պուտինը նոյեմբերի 28-ին հրամանագիր է ստորագրել «ՌԴ քաղաքացիների ազգային անվտանգության ապահովման և ՌԴ քաղաքացիներին հանցավոր և այլ հակաիրավական գործողություններից պաշտպանելու և Թուրքիայի Հանրապետության դեմ հատուկ տնտեսական միջոցներ կիրառելու մասին»: