Փարիզյան հարձակումներից հետո արևմտյան քաղաքական գործիչներից շատերը մտածում են, թե ինչպես ոչնչացնել «Իսլամական պետության» գրոհայիններին ռումբերի ու ցամաքային գործողությունների միջոցով, մինչդեռ, գրոհայիններին չի կարելի հաղթել զուտ ուժային մեթոդներով, գրում է The Financial Times-ը:
Հոդվածի հեղինակը կարծում է, որ ԻՊ ոչնչացման համար հարկավոր է հեղինակազրկել խմբավորումը, իսկ դրա համար սուննի մահմեդականների օգնությունն է հարկավոր: Չի կարելի թույլ տալ, որ ԻՊ-ն լինի սուննիների շահերը պաշտպանող միակ կողմը, չի կարելի թույլ տալ ԻՊ-ին համոզել սուննիներին, որ Արևմուտքը պատերազմում է նրանց դեմ:
Հեղինակը նաև կարծում է, որ Մոսկվան պետք է լիարժեք մասնակցություն ունենա ԻՊ դեմ պայքարին: Ուստի հարկավոր է համոզել ՌԴ նախագահ Պուտինին հրաժարվել Ասադին աջակցելուց, քանի որ վերջինիս պաշտոնավարումը միայն երկարացնում է հակամարտության ընթացքը: Եթե Ռուսաստանը չպահանջի կրակը դադարեցնել Սիրիայի և Իրանի դաշնակիցներից, ապա ԱՄՆ-ն ստիպված կլինի անվտանգ գոտի ստեղծել, որը ոչ միայն կխանգարի Պուտինին աջակցել Ասադին, այլ նաև կսահմանափակի նրա ազդեցությունը տարածաշրջանում:
Այնուամենայնիվ Եվրոպայի համար թռիչքներից զերծ գոտու ստեղծումը շահավետ կլինի, քանի որ թույլ կտա կասեցնել փախստականների հոսքը: Այն նաև կբխի Թուրքիայի, Սաուդյան Արաբիայի, Քաթարի ու Էմիրությունների շահերից, որոնք ցանկանում են նվազեցնել կորուստները սիրիացի սուննիների շրջանում, գրում է Gazeta.ru-ն:
Ավելի վաղ հայտնի դարձավ, որ Գերմանիան անհրաժեշտ է համարում Ասադի և ընդդիմության հաշտեցումը: Ֆրանսիայի մայրաքաղաք Փարիզում նոյեմբերի 13-ի երեկոյան 7 ահաբեկչական հարձակում է իրականացվել։ Ըստ վերջին տվյալների, «Բատակլան» թատրոնում, «Ստադ դե Ֆրանս» ստադիոնի մոտակայքում ու Փարիզի ևս 5 այլ կետում միաժամանակյա հարձակումների ընթացքում զոհվել է 132 մարդ, մոտ 350 հոգի վիրավոր է։Ֆրանսիայում նախագահի հրամանով ատրակարգ դրություն է հայտարարված: