2007 թվականի գարնանը սկսվում է Կարս-Ախալքալաք-Թբիլիսի-Բաքու երկաթուղային տրանսպորտային միջանցքի կառուցման եւ շահագործման նախագծի աշխատանքները, լրագրողներին հայտարարել է Վրաստանի վարչապետ Զուրաբ Նոգաիդելին: Նրա խոսքերով, ներկա դրությամբ ընթանում է ճանապարհի նախագծումը: «Մենք աշխատանքային խմբեր ենք ստեղծում` Ադրբեջանի տրանսպորտի նախարարի եւ Վրաստանի տնտեսական զարգացման նախարարի գլխավորությամբ, որպեսզի արագացնենք պայմանագրերի կնքման նախապատրաստման գործընթացը: Վարկի չափի եւ պայմանների վերաբերյալ վերջնական որոշում դեռ գոյություն չունի, այդ հարցերը որոշվում են բանակցությունների ավարտից հետո»,- նշել է նա:

Ինչպես նշել է Զ. Նոգաիդելին, մինչեւ 2007 թվականի առաջին քառորդի վերջ կավարտվի բանակցային գործընթացը եւ կողմերը կստորագրեն համապատասխան միջկառավարական պայմանագրերը: 2007 թվականի գարնանը կսկսվի մի երկաթուղային ճյուղի վերականգնումը, իսկ տարվա վերջում` երկրորդի կառուցումը:

Նշենք, որ Կարս-Ախալքալաք-Թբիլիսի-Բաքու երկաթուղային միջանցքի նախագիծը ենթադրում է Կարս-Ախալքալաք երկաթուղային ճյուղի կառուցում` 98 կմ երկարությամբ, որից 68 կմ-ը անցնում է թուրքական, իսկ 30-ը` վրացական տարածքով: Նաեւ ծրագրվում է Ախալքալաք-Թբիլիսի հատվածի վերակառուցումը: Նախագիծը գնահատվում է $420 մլն., որից $220 մլն.-ը պահանջվում է վրացական տարածքում աշխատանքներ կատարելու համար, հայտնում է Day.az-ը:

Հիշեցնենք, որ Հայաստանը դեմ է Կարս-Ախալքալաք-Թբիլիսի-Բաքու երկաթգծի կառուցմանը` այս նախագիծը տնտեսապես աննպատակահարմար գտնելով, քանի որ տվյալ երկաթուղային ճյուղի կառուցումն իրականացվում է ի հակակշիռ արդեն գոյություն ունեցող Կարս-Գյումրի-Թբիլիսի-Բաքու երկաթուղու: