ՌԴ-ում առաջարկում են արգելել Թուրքիայից թեթև արդյունաբերության ապրանքների ներմուծման 80%-ը

22 դեկտեմբերի 2015 - 13:35 AMT

PanARMENIAN.Net - ՌԴ արդյունաբերական առևտրի նախարարությունն առաջարկել է արգելել թուրքական արտադրության թեթև արդյունաբերության ապրանքների ներմուծման 70–80%-ը: Այս մասին հայտնել է Interfax-ը փոխնախարար Վիկտոր Եվտուխովի վրա հղումով:

«Մենք ներկայացրել ենք առաջարկն այն մասին, որ կցանկանայինք արգելք սահմանել նաև թեթև արդյունաբերության ապրանքների մասով, առաջին հերթին մեր արտադրողների համար բարենպաստ պայմաններ ստեղծելու համար: Բայց ինչ որոշում կընդունվի, չեմ կարող ասել»,-նշել է Եվտուխովը:

Ավելի վաղ «Կոմերսատը» հայտնել էր, որ հակաթուրքական պատժամիջոցները կարող են տարածվել հյուրանոցային գործի, փայտավերամշակման, օդաչուների ուսուցման և պետպատվերների վրա: Նախարար Դենիս Մանտուրովը դեկտեմբերի սկզբին հայտարարեց, որ դեռևս կառավարությունը մտադիր չէ սահմանափակել թեթև արդյունաբերության արտադրանքի ներմուծումը Թուրքիայից:

Սակայն, աղբյուրը տնտեսական զարգացման նախարարությունում հայտնել է լրագրողներին, որ ՌԴ կառավարությունը կարող է Թուրքիայի դեմ գործող պատժամիջոցների ցանկի ընդլայնման մասին որոշում կայացնել արդեն այս շաբաթ: Ավելի վաղ հայտնի դարձավ, որ Zara, Mango և H&M ընկերությունները կարող են հրաժարվել հագուստը Թուրքիայում կարելուց` ռուսական պատժամիջոցների պատճառով: Ըստ թուրքական T24-ի, ընկերությունները պահանջել են թուրք գործընկերներից հագուստի վրայից հանել Made in Turkey մակնշումը, քանի որ դա դժվարացնում է առաքումը Ռուսաստան:

ՌԴ և Թուրքիայի հարաբերությունները կտրուկ վատթարացան թուրքական օդուժի կողմից ռուսական Սու-24-ի խոցումից հետո:

Նոյեմբերի 24-ին թուքական F-16 կործանիչը ռուսական Սու-24 ինքնաթիռ է խոցել Սիրիայի հետ սահմանին: Սու-24 ռուսական ռազմական ինքնաթիռը խոցվել է Սիրիայի տարածքում «օդ-օդ» հրիթռով, հայտարարել է Ռուսաստանի նախագահ Վլադիմիր Պուտինը: Ըստ ՌԴ նախագահի, ռուս օդաչուներն ու ռուսական ինքնաթիռը չէին սպառնում Թուրքիային: «Սու-24 ռուսական ռազմական ինքնաթիռի խոցումը հարված է թիկունքից, որ հասցրեցին ահաբեկիչներին աջակցողները»,-ասել է նա: Միաժամանակ ՌԴ նախագահը հայտարարել է, որ ՌԴ-ն վաղուց է ֆիքսել, որ Թուրքիայի տարածքում շատ նավթ կա, որը ստացվում է ԻՊ կողմից վերահսկվող հանքերից:

Ռուսաստանի նախագահ Վլադիմիր Պուտինը հրամայել է Սիրիայում ռուս զինծառայողներին սպառնալիքի դեպքում ծայրահեղ կոշտ գործել: «Ռուսական խմբավորմանը կամ ցամաքային ենթակառուցվածքներին սպառնացող ցանկացած թիրախ ենթակա է անհապաղ ոչնչացման»,-ասել է Պուտինը ՌԴ ՊՆ կոլեգիայի նիստում:

Դեկտեմբերի 1-ից Ռուսաստանում արգելվել են չարթերային թռիչքները դեպի Թուրքիա, բացառությամբ ռուս զբոսաշրջիկներին վերադրձնելու համար գործարկվածներից: 2016-ի հունվարի 1-ից Ռուսաստանը կասեցնում է առանց մուտքի արտոնգրերի ռեժիմը Թուրքիայի քաղաքացիների համար:

ՌԴ կառավարությունն արգելել է սառեցված մսի և մսամթերթի, թռչնամսի, կաթի և կաթնամթերքի, այդ թվում կաթնաշոռի և պանրի, ինչպես նաև լակտոզայից զերծ արտադրանքի, ձկան, ընկույզի և մրգի, բանջարեղենի, հատապտղի և կանաչիի ներմուծումը Թուրքիայից: Թուրքիայից ի թիվս այլ ապրանքների արգելվում է ՌԴ ներկրել լոլիկ, սոխ, վարունգ, ցիտրուսներ, խաղող, խնձոր, տանձ, ծիրան, դեղձ և նեկտարին, սալոր, ելակ, աղ:

Հղումներ թեմայով.

Interfax.ru. Минпромторг предложил запретить импорт 80% легкой промышленности из Турции