Հայկական սփյուռքը մեր ժողովրդի կենսական տարածքն ընդարձակելու միջոց է, մեր մշակութային հարստությունը բազմապատկելու եւ իմացությունը միմյանց փոխանցելու օղակ, ամուր հենարան տնտեսական եւ քաղաքական ներդրումների համար, որոնցով նա կարող է մասնակցել մեր երկրի եւ ժողովրդի զարթոնքին: Այդ մասին հայտարարել է Հայաստանի արտգործնախարար Վարդան Օսկանյանը, ելույթ ունենալով Փարիզում Հայկական Բարեգործական Ընդհանուր Միության (AGBU) 100-ամյակին նվիրված միջոցառմանը: «Եւ Հայաստանի անկախությունից ի վեր, AGBU-ն մեր համազգային այն կառույցներից մեկը եղավ, որ վերարժեւորեց իրադրությունը եւ ակտիվորեն ներգրավվեց Հայաստանի վերաշինության մեջ: Ես համոզված եմ, որ առաջիկա տասնամյակը Հայաստանի համար լինելու է տեւական առաջընթացի տասնամյակ: Այդպիսով միայն մենք կարող ենք պահպանել Սփյուռքի նոր սերնդի հայկական ինքնությունը` նրան առաջարկելով ժողովրդավարական եւ բարգավաճ Հայաստան, որի հետ նրանք կարող են նույնացվել եւ հպարտանալ նրանով», ընդգծել է ՀՀ ԱԳՆ ղեկավարը:

Փարիզում Վ. Օսկանյանը ՀԲԸՄ ղեկավարության, ինչպես նաեւ Սփյուռքի այլ կառույցների ներկայացուցիչների հետ առանձին հանդիպումների ժամանակ քննարկեց Հայաստանի զարգացման, մասնավորապես, գյուղական շրջանների վերականգնման ծրագրերի հետ կապված հարցեր, հայտնում է ՀՀ ԱԳՆ մամլո ծառայությունը: