Հալեպի բնակչությունը արդեն 10 օր զրկված է ջրից, իսկ ավելի քան 4 ամիս՝ էլեկտրականությունից: Այս մասին գրում է Հալեպի «Գանձասար» թերթի ֆեյսբուքյան էջը:

Բնակչությունն օգտվում է ջրհորներից, իսկ խմելու համար ստիպված գնում է հանքային ջուր: Էլեկտրականությունն ապահովում են էլեկտրածին սարքերը, որոնք վաճառվում են:

Բնակչությունը ջրհորների ջուրն է օգտագործում, իսկ խմելու համար ստիպված է լինում հանքային ջուր գնել: Էլեկտրականությունն ապահովում են էլեկտրածին սարքերը, որոնք վաճառվում են:

Ապահովության համար սիրիական բանակը հունվարի 27-ին իր հսկողության տալ է առել Հալեպի արևելան շրջանի արվարձաններում գտնվող Ալ Ուատիաա գյուղը, որը հարակից է Հալեպը մատակարարող էլեկտրակայանին:

Բանակի յուրաքանչյուր առաջընթացի դեպքում ահաբեկչական խմբավորումները հրթիռներ են արձակում բնակելի թաղամասների վրա:

Հունվարի 18-ին հայտնի է դարձել, որ զինյալ ահաբեկչական խմբավորումները հունվարի 17-ին հրթիռակոծել են Հալեպի Մունշիե, Ազիզիե, Սաատ Ալլա Ճապրի շրջանները: Այդ թվում հրթիռակոծել են Հայ Ավետարանական Էմանուել եկեղեցին՝ առավոտյան պատարագից ժամեր անց: Մարդիկ չեն տուժել, միայն եկեղեցին է մեծ վնասներ կրել:

Հալեպի Ավետարանական Էմանուել եկեղեցին մոտ 100 տարվա պատմություն ունի:

Զինյալ ահաբեկչական խմբավորումները հրթիռակոծել են Հալեպը նաև 2015-ի դեկտեմբերի 24-ին: Հրթիռակոծվել են միանգամից մի քանի շրջան՝ Մունշիե, Քոսթաքի Հըմսի, Նեյյել և Ազիզիե: Սեպտեմբերի 21-ին Հալեպի Նոր Գյուղի և Ժապրիեի շրջաններն են հրթիռակոծվել: Սիրիայի զինյալ խմբավորումները տասնյակ հրթիռներ են արձակել նաև Հալեպի Ազիզիե, Նոր Գյուղ, Ժապրիե, Սուլեյման ալ Հալապի հայաշատ բնակավայրերի ուղղությամբ:

Ռմբակոծությունների հետևանքով զոհվել ու վիրավորվել են բազմաթիվ մարդիկ։ Վիրավորների թվում նաև հայեր են եղել:

Նոյեմբերի 4-ին սիրիական բանակի մարտիկներն աշխարհազորայինների աջակցությամբ ազատագրել են Սալմիա-Հանասիր ավտոմայրուղին Համա քաղաքից դեպի արևելք: Այդ ավտոմայրուղին «կյանքի ճանապարհ» են անվանում, քանի որ դրանով է իրականացվում Սիրիայի հյուսիսային մայրաքաղաք Հալեպի մատակարարումը: Մինչ այդ այն շրջափակված էր «Իսլամական պետության» և «Ջեբհաթ ան Նուսրա» ահաբեկչական խմբավորումների կողմից: Ինչպես հայտնել է «Ալ Վաթան» թերթը, ազատագրվել է ավտոմայրուղուց 15 կմ խորությամբ տարածք:

Ներքին հակամարտությունից առաջ Սիրիայում բնակվում էր ավելի քան 100.000 հայ, որոնց մեծ մասն ապրում էր երկրի հյուսիսում` Հալեպ գավառում և հյուսիս–արևելքում` էլ–Խասակե գավառում։ Դամասկոսում բնակվում էր մոտ 7.000 հայ։