Անկարան €5 մլրդ է պահանջում ԵՄ-ից փախստականների հոսքը կասեցնելու համար

30 հունվարի 2016 - 13:10 AMT

PanARMENIAN.Net - Թուրքիան դիմել է ԵՄ-ին` խնդրելով գրեթե կրկնապատկել միգրացիոն ճգնաժամի համար նախատեսված ֆինանսական օգնությունը` €3 մինչև €5 մլրդ: Միջոցները նախատեսված են Թուրքիայի տարածքում փախստականներին պահելու համար, հայտնում է Die Welt-ը:

Այդ մասին պարբերականին է հայտնել աղբյուրը ԵՄ դիվանագիտական շրջանակներում: «Անկարան հիմա €5 մլրդ է պահանջում, բայց մենք պատրաստ ենք հատկացնել միայն €3 մլրդ»,-ասել է պարբերականի զրուցակիցը, հայտնում է ՌԲԿ-ն:

Ըստ պարբերականի, Բրյուսելի և Անկարայի միջև բանակցությունները բարդանում են նաև այն պատճառով, որ ԵՄ-ն ցանկանում է վերահսկել միջոցների ծախսը, որոնք, ըստ եվրապաշտոնյաների, պետք է հատկացվեն միայն կոնկրետ նախագծերի համար: Վիճակը բարդանում է նաև նրանով, որ նույնիսկ խոստացված 3 միլիարդը դեռ չի հատկացվել` Իտալիայի կողմից արգելափակելու պատճառով:

2015-ի նոյեմբերի 29-ին գագաթնաժողովում ԵՄ երկրները նախնական հավանություն տվեցին մի ծրագրի, որի համաձայն նախատեսվում է 3 մլրդ եվրո հատկացնել Թուրքիային` «փախստականների հումանիտար կարիքները հոգալու համար»: Այդպիսի առաջարկով հանդես եկավ Գերմանիայի կանցլեր Անգելա Մերկելը: Մերկելը հայտարարել էր նաև, թե ԵՄ առաջնորդները պայմանավորվել են արագացնել Թուրքիայի անդամակցումը ԵՄ-ին:

Ավելի վաղ հայտնի դարձավ, որ Իտալիան արգելափակել է €3 մլրդ հատկացումը Թուրքիային: Ինչպես հայտարարել է Իտալիայի ֆինանսների նախարար Պիեռ Կառլո Պադոան, գումարը հատկացվելու է Եվրամիության միասնական բյուջեից, իսկ կոնկրետ նպատակները, թե ինչի համար է այն ծախսվելու, հայտնի չեն: Ուստի Հռոմն արգելափակել է Անկարային գումարը հատկացնելու Եվրահանձնաժողովի որոշումը:

Մինչդեռ փախստականների հոսքը Եվրամիություն չի նվազում:

Հղումներ թեմայով.

RBC.ru. Анкара потребовала у ЕС €5 млрд для удержания беженцев

Sputnik International. Turkey Wants Additional $2Bln From EU for Migrant Crisis Management