Առնվազն 200 խաղաղ բնակիչ արգելափակված է Թուրքիայի հարավ-արևելքում իշխանությունների կողմից իրականացվող ռազմական գործողության հետևանքով: Այդ մասին հայտարարել է Թուրքիայի խորհրդարանի անդամՖելեքնաս Ուջանը Sputnik գործակալությանը:

«Իրավիճակը Դիարբեքիրի գավառում սարսափելի է: Սուրի շրջանում արդեն 79-րդ օրն է պարետային ժամ է գործում: 200 մարդ արգելափակված է նկուղներում, սակայն թուրք ռազմական հատուկջոկատայինները թույլ չեն տալիս նրանց փրկել»,-ասել է Թուրքիայի Ժողովրդների դեմոկրատական կուսակցությունից ընտրված պատգամավորը, որն ակտիվորեն պաշտպանում է երկրում ազգային փոքրամասնությունների իրավունքները, հայտնում է ՌԻԱ Նովոստին:

Թուրքական իշխանությունները դեկտեմբերին պարետային ժամ են հաստատել երկրի հարավ-արևելյան շրջանների քրդաբնակ բնակավայրերում: Սուրում շարունակվում են ՔԱԿ և թուրք ուժայինների բախումները: Թուրքական ԶՈՒ-ն պարետային ժամի ընթացքում իրականացրել է լայնածավալ գործողություններ` քուրդ գրոհայինների փորած խրամատները ծածկելու, բարիկադները հեռացնելու և ինքնաշեն ռումբերը հայտնաբերելու ուղղությամբ: Թուրք ուժայինները արգելք են դրել փողոց դուրս գալու վրա: Ջիզրեում և Սուրում շարունակվում են փողոցային բախումները:

Ըստ Թուրքիայի գլխավոր շտաբի տվյալների, դեկտեմբերի կեսից հակաահաբեկչական գործողության շրջաններում ոչնչացվել է ավելի քան 900 քուրդ գրոհային: Սակայն քրդամետ Ժողովրդների դեմոկրատական կուսակցության ներկայացուցիչները պնդում են, որ գործողության ընթացքում տասնյակ խաղաղ բնակիչներ են զոհվել: