Հայկական 5 ստարտափ կմասնակցի Սիլիկոնյան հովտում կայանալիք ՏՏ համաժողովին

11 մարտի 2016 - 11:50 AMT

PanARMENIAN.Net - Համաշխարհային բանկը, ՀՀ կառավարությունը և «Ձեռնարկությունների ինկուբատոր» հիմնադրամը Ձեռնարկատիրության և ղեկավարների վերապատրաստման կենտրոնի (CEED) հետ համատեղ կազմակերպում են Հայաստան-ԱՄՆ ՏՏ աքսելերացիայի ծրագիր` էլեկտրոնային հասարակության և մրցունակության համար նորարարության ծրագրի շրջանակում:

Ծրագիրը հրավիրում է սկսնակ և նոր լուծումներ առաջարկող ընկերություններին մասնակցել զարգացման ծրագրին, որը ներառում է նաև թրեյնինգներ Հայաստանում և ԱՄՆ-ում:

Ծրագրի երևանյան մասի ավարտից հետո 5 սկսնակ ընկերություն հնարավորություն կստանա մասնակցելու Հայաստանի ՏՏ ոլորտի սկսնակ ընկերություններին նվիրված Armenia IT Start-Up համաժողովին, որը տեղի կունենա հունիսին Սիլիկոնյան հովտում: Ընկերությունները կկարողանան իրենց պրոդուկտը ներկայացնել պոտենցիալ հաճախորդներին, գործընկերներին և ներդրողներին:

Մասնակիցներին նաև հասանելի կդառնա CEED գլոբալ ցանցը, որը ներառում է գործարարների և ներդրողների ամբողջ աշխարհից:

Սիլիկոնյան հովիտը ամենամեծ ու նշանակալի տեխնոլոգիական կլաստերն է աշխարհում: Սիլիկոնյան հովտում են գտնվում Facebook, Google, Amazon, Apple և աշխարհի հարյուրավոր այլ խոշորագույն տեխնոլոգիական ընկերությունների կենտրոնակայանները: