Իսրայելի Քնեսեթի փոխխոսնակը խստորեն դատապարտել է ԼՂ դեմ Ադրբեջանի ռազմական գործողությունները

Իսրայելի Քնեսեթի փոխխոսնակը խստորեն դատապարտել է ԼՂ դեմ Ադրբեջանի ռազմական գործողությունները

PanARMENIAN.Net - Իսրայելի Քնեսետի փոխխոսնակ Թալի Պլոսկովը խստորեն դատապարտել է Ադրբեջանի ռազմական գործողությունները Լեռնային Ղարաբաղի դեմ և կոչ է արել հաստատել խաղաղություն: Ապրիլի 4-ին ԱԺ Հայաստան-Իսրայել բարեկամական խումբն ընդունել է Իսրայելի Քնեսետի փոխխոսնակ, Իսրայել-Հայաստան պատգամավորական բարեկամական խմբի ղեկավար Թալի Պլոսկովին:

Հանդիպման ընթացքում քննարկվել են երկու երկրների խորհրդարանական հարաբերությունների հետագա զարգացմանը վերաբերող հարցեր: Խորհրդարանականները խոսել են երկու ժողովուրդներին կապող պատմական ընդհանրություններից, ներկայում ունեցող միանման խնդիրներից, սեփական երկրի սահմանների պաշտպանության և անվտանգության թեմաներից: ԱԺ Հայաստան-Իսրայել բարեկամական խմբի անդամներ են խմբի ղեկավար Արտակ Զաքարյանը, խմբի անդամներ Ալեքսանդր Արզումանյանը, Էդմոն Մարուքյանը, Կարեն Բեքարյանը, Թևան Պողոսյանը, Հրանտ Բագրատյանը և Նաիրա Կարապետյանը:

Ողջունելով հյուրերին՝ Արտակ Զաքարյանը կարևորել է Իսրայելի խորհրդարանականների մասնակցությունը Հայոց ցեղասպանության 100-րդ տարելիցի միջոցառումներին: Հանձնաժողովի նախագահը, խոսելով հայ-ադրբեջանական հարաբերություններից և Լեռնային Ղարաբաղի հիմնախնդրից, նշել է, որ Հայաստանը ձգտում է բոլոր տիպի խնդիրները լուծել խաղաղ և քաղաքական ճանապարհով: Արտակ Զաքարյանը նշել է, որ ապրիլի 2-ի գիշերը ադրբեջանական զինուժը հարձակվել է ղարաբաղյան դիրքերի վրա: Ընդգծվել է, որ մինչ այդ հրետակոծվում էին նաև Հայաստանի սահմանները, սակայն վերջին օրերի զարգացումն ուղղված է եղել միայն Լեռնային Ղարաբաղի դեմ՝ նպատակ ունենալով գնդակոծել ԼՂՀ խաղաղ բնակչությանն ու պաշտպանական ստորաբաժանումներին: Ըստ պարոն Զաքարյանի՝ Ադրբեջանը ռազմական ագրեսիա է ծավալել՝ խախտելով բոլոր պայմանավորվածություններն ու բանակցային սկզբունքները:

Հանձնաժողովի նախագահը նշել է, որ Ադրբեջանը փորձում է ԼՂ հիմնախնդիրը տանել ռազմական լուծման ճանապարհով: Արտակ Զաքարյանի խոսքով՝ Ադրբեջանը կիրառել է լայն զինանոց: «Հայաստանը ևս տարբեր երկրներից ձեռք է բերում զենք ու զինամթերք, սակայն դրանք ուղղված են խաղաղության պահպանմանը և տարածաշրջանային կայունությանը»,-ասել է պարոն Զաքարյանը: Նշվել է, որ Հայաստանը, փաստացի, ԼՂ-ի հետ միասին հանդիսանում է տարածաշրջանի կայունության միակ երաշխավորը: Խաղաղության հասնելու ամենակարճ ճանապարհը, ըստ Արտակ Զաքարյանի, ԼՂ-ի և ՀՀ-ի հետ երկխոսությունն է՝ ԵԱՀԿ ՄԽ բանակցային ձևաչափում:

Խոսելով ղարաբաղա-ադրբեջանական հակամարտ զորքերի շփման գծում տեղի ունեցող իրադարձություններից՝ Իսրայել-Հայաստան պատգամավորական բարեկամական խմբի ղեկավար, Քնեսետի փոխխոսնակ Թալի Պլոսկովը խստորեն դատապարտել է Ադրբեջանի ռազմական գործողությունները Լեռնային Ղարաբաղի դեմ և կոչ է արել հաստատել խաղաղություն: Քնեսետի պատգամավորները նշել են, որ խնդրի միակ լուծումը խաղաղությունն է, որը երկարատև գործընթաց է:

Հյուրերը ևս ընդգծել են Իսրայելի Քնեսետի և ՀՀ Ազգային ժողովի հետ հարաբերություններն ակտիվացնելու անհրաժեշտությունը, ինչպես նաև պատրաստակամություն հայտնել աջակցելու համագործակցությանը փոխադարձ կարևորություն ունեցող մի շարք ոլորտներում՝ տնտեսական, մշակութային, զբոսաշրջության:

Հայ խորհրդարանականները ևս կարևորել են խորհրդարանական կապերի զարգացումը, խոսել են տարածաշրջանային խնդիրներից, անդրադարձ կատարել Իսրայելում հայկական համայնքի և Հայաստանում հրեական համայնքի կարևոր դերակատարմանը բարեկամական հարաբերություններում: Այս մասին հայտնում է ՀՀ ԱԺ մամուլի ծառայությունը:

Ապրիլի լույս 2-ի գիշերից ղարաբաղա-ադրբեջանական շփման գծում շարունակվող մարտերում ՊԲ ստորաբաժանումները, ըստ ԼՂՀ ՊՆ տվյալների, ոչնչացրել են հայկական դիրքերի ուղղությամբ գրոհող թշնամական 2 ուղղաթիռ, ինչպես նաև 6 անօդաչու թռչող սարք (ԱԹՍ), 20 տանկ, 5 զրահամեքենա 1 ՏՕՍ ծանր հրանետային համակարգ: Ադրբեջանն ընդունել է 15 զինծառայողի զոհվելու, ինչպես նաև 1 տանկի ու 1 ուղղաթիռի ոչնչացման փաստը և չի հայտնել ոչ մի վիրավորի մասին՝ այն դեպքում, երբ միայն հայկական կողմի հրապարակած ֆոտո- և տեսանյութերում առկա են մի քանի տասնյակ դիակներ, 1 ուղղաթիռ և 2 ԱԹՍ:

Հայկական կողմից զոհվել է 18 զինծառայող, մոտ 37-ը վիրավոր է: Հայկական կողմը նաև կորցրել է մեկ տանկ: Բացի առաջնագծում ընթացող մարտերից, հակառակորդը հրթիռահրետանային հարվածներ է հասցրել խաղաղ բնակավայրերին: Մարտունիում դպրոցի հրետակոծման հետևանքով զոհվել է 12-ամյա երեխա, 3 տարեց մարդ դաժանաբար սպանվել է Թալիշ գյուղում: Եվս 6 քացաքացիական, որոնցից երկուսը երեխա էին, վիրավորվել են:

 Ուշագրավ
Նա նշել է, որ այժմ միայն ինստիտուցիոնալ բարեփոխումներ և բովանդակային աշխատանք պետք է արվի
Նա նշել է, որ երկրների միջև ռազմատեխնիկական համագործակցությունը երկար ավանդույթ ունի
Նա չկար ՀՀ վերադարձած հայ գերիների թվում, թեև ավելի վաղ Ադրբեջանում հրապարակած ցուցակում նրա անունն ընդգրկված էր
Փաշինյանի հեռախոսազրույցը Ղազախստանի նախագահ Կասիմ-Ժոմարտ Տոկաևի հետ
---