Զբոսաշրջության ոլորտից Թուրքիայի եկամուտը 2016-ի սկզբից նվազել է 16.5%-ով

5 մայիսի 2016 - 10:57 AMT

PanARMENIAN.Net - Թուրքիայի զբոսաշրջության ոլորտի եկամուտները 2016թ. առաջին քառորդում նախորդ տարվա նույն ժամանակահատվածի համեմատ 16.5%-ով նվազել են: Թուրքական Anadolu լրատվական գործակալության փոխանցմամբ՝ առաջին եռամսյակում նշյալ եկամուտը կազմել է 4 մլրդ 66 մլն 384.000 դոլար:

Թուրքիայի վիճակագրական ընկերության (TÜİK) տվյալների համաձայն՝ զբոսաշրջության ոլորտի եկամուտների 71.3%-ը ձևավորվում է օտարերկրյա այցելուների հաշվին, իսկ 28.7%-ը՝ արտերկրում բնակվող Թուրքիայի քաղաքացիների հաշվին, հայտնում է Ermenihaber-ը:

Նշված ժամանակահատվածում ձեռք բերված եկամուտից 3 մլրդ 744 մլն 812.000 դոլարը գոյացել է անհատական ծախսերի, իսկ 321 մլն 572.000-ը՝ զբոսաշրջային փաթեթների շրջանակներում կատարված ծախսերի հաշվին:

Յուրաքանչյուր այցելուի անհատական միջին ծախսը կազմել է 796 դոլար: Նշվում է նաև, որ օտարազգիների կատարած ծախսերի միջին ցուցանիշը կազմել է 717 դոլար, իսկ արտասահմանում բնակվող քաղաքացիների կատարած միջին ծախսը՝ 1059 դոլար:

Միևնույն ժամանակ, Թուրքիայում բնակվող և արտասահման մեկնող քաղաքացիների կատարած ծախսերը 2016թ. առաջին եռամսյակում ավելացել են 19.9 տոկոսով՝ կազմելով 1 մլրդ 537 մլն 627.000 դոլար:

Թուրքիայի զբոսաշրջության ոլորտում ճգնաժամի պատճառով կտրուկ նվազել են հյուրանոցային համարների գները: Օրինակ, Ստամբուլում հյուրանոցային համարի միջին գինը 140 եվրոյից նվազել է մինչև 91,9 եվրո 24 ժամվա համար: Այդ մասին ասվում է Թուրքիայի հյուրանոցների ասոցիացիայի մարտ ամսվա հաշվետվության մեջ:

2016-ին մարտին արձանագրվել է հյուրանոցների համալրման ամենացածր մակարդակը վերջին մի քանի տարում: 2015-ի նույն ժամանակահատվածի համեմատ անկումը կազմել է 16,5 տոկոս: Հյուրանոցներում ամրագրվել է համարների ընդամենը 52,5 տոկոսը: Հիմնականում Թուրքիան կորցրել է ռուս, գերմանացի և բրիտանացի զբոսաշրջիկներին:

Հղումներ թեմայով.

Ermenihaber.am: Թուրքիայի զբոսաշրջության ոլորտի եկամուտները 16.5 տոկոսով նվազել են