ԱՄՆ Սենատն ընդունել է Հայաստանին ավելի քան $24 մլն տրամադրելու առաջարկը

8 հուլիսի 2016 - 11:56 AMT

PanARMENIAN.Net - ԱՄՆ Սենատը հավանություն է տվել Հայաստանի Հանրապետությանը և մեր տարածաշրջանին ֆինանսական օգնություն ցուցաբերելու առաջարկին։ Այդ մասին տեղեկացնում է Ամերիկայի հայկական համագումարը:

Կայացված որոշման համաձայն՝ ԱՄՆ Սենատը համաձայնվել է 24 մլն 112.000 ԱՄՆ դոլարի օգնություն ցուցաբերել Հայաստանի Հանրապետությունը և 10 մլն 936.000 ԱՄՆ դոլարի՝ Ադրբեջանին։

Նշվում է, որ այդ գումարները չպետք է ծախսվեն ռազմական նպատակներով։ Նախատեսվում է մեկական միլիոն դոլար տրամադրել երկու երկրի արտաքին ռազմական ֆինանսավորման և ևս մեկական 600 հազար դոլար՝ երկու երկրի միջազգային ռազմական կրթության վերապատրաստման համար, գրում է Aravot.am-ը։

Որոշումը կայացնելիս հաշվի է առնվել, որ Հայաստանը մեկ շնչին բաժին հասնող ամենաշատ փախստականներ ընդունած եվրոպական երրորդ երկիրն է։

2016-ին ԱՄՆ-ն նախատեսում է բյուջեով $22 մլն 412.000 հատկացնել Հայաստանին՝ որպես տնտեսական օգնություն: 2015-ի համեմատ, այդ գումարն ավելին է 22%-ով: Սակայն, 2016-ին ևս ԱՄՆ-ի բյուջեով հատկացումներ չեն նախատեսվում Լեռնային Ղարաբաղի համար։

2016-ի փետրվարին ԱՄՆ-ի Հայ դատի հանձնախումբը (ANCA) դիմել էր Միացյալ Նահանգների իշխանություններին` պահանջելով ավելացնել Հայաստանին ու Լեռնային Ղարաբաղին տրամադրվող ֆինանսական օգնության չափը, ինչպես նաև ամրապնդել հայ-ամերիկյան առևտրային կապերը:ANCA-ն պահանջում է Հայաստանին տրամադրվելիք տնտեսական օգնության չափը հասցնել $40 մլն-ի, ինչպես նաև $10 մլն հատկացնել Հայաստանում ապաստանած մոտ 20.000 սիրիահային օգնելու համար:

Հղումներ թեմայով.

ԱՄՆ Սենատը 24 միլիոն 112 հազար դոլար կտրամադրի Հայաստանին. Aravot.am