Եվրախորհրդի նախագահ, Լեհաստանի նախկին վարչապետ Դոնալդ Տուսկը չի կարծում, թե Մեծ Բրիտանիայի դուրս գալը Եվրամիության կազմից նախադեպ կհանդիսանա անդամ այլ պետությունների համար:
Մեծ Բրիտանիայում հունիսի 23-ին տեղի ունեցած ԵՄ անդամության վերաբերյալ հանրաքվեում հաղթանակ են տարել ԵՄ-ից դուրս գալու կողմնակիցները` հավաքելով ձայների 51,8 տոկոսը: ԵՄ կազմում մնալու օգտին քվեարկել է 48%-ը: Վարչապետ Քեմերոնը հայտարարեց, որ հրաժարական կտա:
Տուսկը լուրջ սխալ է անվանել ԵՄ-ից Մեծ Բրիտանիայի դուրս գալը: «Մենք չենք կարող Brexit-ը մեկնաբանել որպես ազդանշան մյուսների համար: Դա լուրջ, բայց միջադեպ էր»,-ասել է նա:
Տուսկը նաև մեկնաբանել է քաղաքական իրավիճակը Լեհաստանում` անվանելով այն շեղում Լեհաստանում ազատական ժողովրդավարության դասական տարբերակից` ՆԱՏՕ-ի և ԵՄ տեսակետից», հայտնում է ՌԻԱ Նովոստին: Ըստ նրա, Լեհաստանը հեռանում է ԵՄ կենտրոնից ծայրամաս:
Եվրամիության կազմից Մեծ Բրիտանիայի դուրս գալու հակառակորդները ցանկանում են այդ հարցի վերաբերյալ նոր հանրաքվե անցկացնել: Այդ է վկայում Միացյալ Թագավորության խորհրդարանի կայքում հրապարակված խնդրագիրը: Նոր հանրաքվեի նախաձեռնողները կոչ են անում կառավարությանը կանոն կիրառել, որի համաձայն, եթե Brexit-ին (ԵՄ-ից Մեծ Բրիտանիայի դուրս գալու վերաբերյալ հանրաքվե) կողմ կամ դեմ քվեարկածների քանակը 60 տոկոսից պակաս է, իսկ մասնակցությունը 75 տոկոսից ցածր, ապա հարկավոր է նոր քվեարկություն անցկացնել:
Ընթերցեք նաև. Օբամա. ՆԱՏՕ-ն պետք է միջոցներ ձեռնարկի ԻՊ, ՌԴ և Brexit-ի դեմ