Սերժ Սարգսյանին` ՀՀ վարչապետ նշանակվելու կապակցությամբ շնորհավորել է ՆԱՏՕ-ի գլխավոր քարտուղար Յաապ Դե Հուպ Սխեֆերը. «Ցանկանում եմ Ձեզ շնորհավորել Հայաստանի Հանրապետության վարչապետ նշանակվելու կապակցությամբ եւ մաղթել ամենայն բարիք Ձեր նոր պաշտոնում: Կցանկանայի նաեւ շնորհակալություն հայտնել Ձեզ` նախկին պաշտպանության նախարարի եւ Ազգային անվտանգության խորհրդի քարտուղարի պաշտոնում Հայաստանի եւ ՆԱՏՕ-ի միջեւ Անհատական գործընկերության գործողությունների ծրագրի շրջանակներում նախանշված պաշտպանական բարեփոխումների գործընթացը գնահատելի ղեկավարելու համար: Շատ հաճելի էր Ձեզ հանդիպել ՆԱՏՕ-ի Կենտրոնակայան վերջերս կատարած Ձեր այցելության ժամանակ եւ քաջատեղյակ եմ, որ Խորհրդի քննարկումները, որոնք տեղի ունեցան մեր հանդիպումից հետո, շատ լավ են ընթացել: Հայաստանը եւ ՆԱՏՕ-ն իրականացնում են արդյունավետ եւ գնահատելի համագործակցություն, ինչն արտահայտվում է Կոսովոյի ուժերի կազմում Հայաստանի մասնակցությամբ, ինչպես նաեւ ԱԳԳԾ շրջանակներում պատվախնդիր քաղաքական եւ պաշտպանական բարեփոխումների գործընթացով: Վստահ եմ վարչապետի պաշտոնում ԱԳԳԾ իրականացման գործընթացին Ձեր ակտիվ մասնակցության եւ այդ կարեւոր աշխատանքը շարունակաբար զարգացնելու ուղղությամբ մեր հետագա համագործակցության մեջ»:

ՀՀ վարչապետ նշանակվելու կապակցությամբ Սերժ Սարգսյանին շնորհավորել է նաեւ Ուկրաինայի վարչապետ Վիկտոր Յանուկովիչը: Ուղերձում վստահություն է հայտնվում, որ հարաբերությունները Ուկրաինայի եւ Հայաստանի միջեւ, որոնք հիմնված են բարեկամության եւ փոխըմբռնման վրա, այսուհետ եւս կնպաստեն փոխշահավետ տնտեսական համագործակցության զարգացմանը` ի բարօրություն մեր ժողովուրդների, հայտնում է ՀՀ կառավարության մամլո ծառայությունը: