Պայթյունների շարք Սիրիայում. 21 զոհ կա, առնվազն 50 վիրավոր

5 սեպտեմբերի 2016 - 13:30 AMT

PanARMENIAN.Net - Սիրիայում 5 հզոր պայթյուն է որոտացել: Պայթյունների հետևանքով մահացել է 21, վիրավորվել առնվազն 50 մարդ, հայտնում է Tert.am-ը սիրիական պետական SANA գործակալության վրա հղումով:

Նշվում է, որ առայժմ ոչ մի ահաբեկչական խմբավորում չի ստանձնել դեպքերի պատասխանատվությունը:

Պայթյունները որոտացել են գրեթե միաժամանակ: Նախ Տարտուս քաղաքում տեղի է ունեցել կրկնակի ահաբեկչություն: Սիրիայի պետական հեռուստաալիքը հաղորդել է, որ պայթել է ականապատ ավտոմեքենա, ինչից հետո պայթուցիկ սարք է գործի դրել մահապարտ ահաբեկիչը: SANA-ի փոխանցմամբ՝ այդ ահաբեկչության հետևանքով մահացել է 11, վիրավորվել՝ մոտ 45 հոգի:

Եվս երկու հոգի մահացել են Հոմս քաղաքում տեղի ունեցած պայթյունի հետևանքով:

Չորրորդ պայթյունը տեղի է ունեցել Դամասկոսի արվարձաններից մեկում, որի հետևանքով զոհվել է 3 մարդ։ Հինգերորդ պայթյունը տեղի է ունեցել Հասաքե քաղաքում, զոհվել է 5 մարդ:

ՌԴ ԱԳ նախարար Սերգեյ Լավրովը, որը Ժնևում բանակցում էր ԱՄՆ պետքարտուղար Ջոն Քերիի հետ, հանդիպման ավարտին հայտարարեց, որ «Դարայան լքելու գործողությունն ավարտված է»: Լավրովն ու Քերին համաձայնեցրել են պայմանները, որ անհրաժեշտ են նոր հրադադարի փուլային հաստատման համար, սակյան չեն ստորագրել համաձայնագիրը: Դետալները դեռ մշակվում են:

Մայիսին սիրիական Ջաբլե և Տարտուս քաղաքներում պայթյունների հետևանքով ավելի քան 100 մարդ էր զոհվել:

Հղումներ թեմայով.

Reuters: Blasts hit government-held and Kurdish parts of Syria, several killed

Ria.ru: Серия терактов в Сирии: десятки человек погиблт

Tert.am. 5 հզոր պայթյուն Սիրիայում, 21 զոհ, մոտ 50 վիրավոր