Ուդի ամերիկահայ վարպետ Արա Դինքչյանը՝ Նյու Յորքի İstanbulive փառատոնի հյուր

12 սեպտեմբերի 2016 - 16:16 AMT

PanARMENIAN.Net - Հոկտեմբերի 9-ին Նյու Յորքում կկայանա İstanbulive երաժշտական փառատոնը, որը կազմակերպվում է արդեն յոթերորդ անգամ: 2016-ին Թուրքիայի մշակութային հիմնադրամի կողմից կազմակերպված փառատոնին կմասնակցեն Taksim տրիոն, հայտնի թուրք դաշնակահար Թուլուգ Թիրփան և երգչուհի Զառան:

Փառատոնի հատուկ հյուրերն են ամերիկահայ անվանի երաժիշտ, երգահան, ուդի վարպետ Արա Դինքչյանը և հույն երաժիշտ Ռեբեթ Ասքերը, հայտնում է Ermenihaber.am-ը:

Արա Դինքչյանը ծնվել է 1958թ. ԱՄՆ Նյու Ջերսի նահանգում՝ արմատներով դիարբեքիրից է: Հայրը՝ Օնիկ Դինքչյանը, հայտնի է եղել որպես եկեղեցական երգչախմբի մեներգիչ և ժողովրդական երաժշտության վարպետ:

Արա Դինքչյանն առաջին անգամ բեմ է բարձրացել 5 տարեկան հասակում՝ 1964թ. Նյու Յորքում կազմակերպված համաշխարհային տոնավաճառի ժամանակ՝ ներկայանալով հարվածային գործիքներով:Մեկ այլ անվանի ամերիկահայ երաժիշտ Արտո Թունջբոյաջյանի հետ 1986թ. հիմնել է Night Ark էթնո-ջազային խումբը:

Նա իր մտերիմ ընկեր, կոմպոզիտոր, գործիքավորող Օննո Թունջի Հովհաննես Թունջբոյաջյան) միջոցով առնչվել և համագործակցել է մի շարք թուրք երաժիշտների հետ: Մասնավորապես հայտնի են թուրք երգչուհի Սեզան Աքսուի Dinata, Vazgeçtim և Ահմեթ Քայայի Ağladıkça երգերը, որոնց հեղինակը Արա Դինքչյանն է:

Հղումներ թեմայով.

Ամերիկահայ ուդի վարպետ Արա Դինքչյանը Նյու Յորքի «İstanbulive» փառատոնի հյուրն է. Ermenihaber.am