Ռուսաստանը ևս մեկ անգամ հավաստիացավ, որ Թուրքիայի հետ «բարեկամությունը» որոշակի սահմաններ ունի և բավականին պայմանական է: Այս մասին հայտարարել է ՌԴ Դաշնության խորհրդի պաշտպանության և անվտանգության գծով փոխնախագահ Ֆրանց Կլինցևիչն` անդրադառնալով Էրդողանի խոսքերին Ղրիմի հարցում հետագայում ևս Ուկրաինային սատարելու մասին, հայտնում է Lenta.ru-ն:

Թուրքիայի նախագահ Ռեջեփ Թայիփ Էրդողանը խոստացել է Ուկրաինայի նախագահ Պյոտր Պորոշենկոյին, որ Անկարան չի հրաժարվի ՌԴ-ին Ղրիմի միացման հարցում իր դիրքորոշումից: Այդ մասին Էրդողանը հայտարարել է Նյու Յորքում ընթացող ՄԱԿ ԳՎ 71-րդ նստաշրջանում կայացած քաղաքական գործիչների հանդիպումների ժամանակ:

Նա հավելել է նաև, որ Էրդողանը հազիվ թե հայտարարություններից առաջ անցնի Ուկրաինային սատարելու հարցում: «Էրդողանը հասկանում է, որ հակառակ դեպքում «ռիսկի է գնում»,-ասել է Կլինցևիչը` հիշեցնելով, որ ռուս-թուրքական հարաբերությունները նոր-նոր են սկսել կարգավորվել: «Բայց խոսքերը միշտ չէ որ զուտ հայտարարություն է:

Տպավորություն է ստեղծվում, որ Թուրքիայի նախագահը, պատկերավոր ասած, փորձում է մեկ դաշնամուրի վրա միաժամանակ մի քանի եղանակ նվագել»,-ասել է Կլինցևիչը:

Նա նաև վստահություն է հայտնել, որ ՌԴ ԱԳՆ-ում արդեն ուշադրություն դարձրել են Էրդողանի խոսքերի վրա` «համապատասխան եզրակացություններ անելով»:

Էրդողանը հայտարարել է նաև, որ Ռուսաստանի հետ երկխոսության վերսկսումը չի անդրադառնա Ղրիմի հարցում Թուրքիայի դիրքորոշման վրա նաև «Ղրիմի թաթարների իրավունքների խախտման» հարցում:

2014-ի մարտի 16-ին Ղրիմում անցկացվեց տարածաշրջանի կարգավիճակի վերաբերյալ հանրաքվե: Քվեարկության մասնակցած թերակղզու բնակիչների մեծ մասը արտահայտվեց Ռուսաստանին միանալու օգտին: Ավելի ուշ Ղրիմի Գերագույն խորհուրդը անկախություն հռչակեց: Ռուսաստանի նախագահ Վլադիմիր Պուտինը ստորագրեց Ղրիմի ու Սևաստոպոլի` Ռուսաստանին միանալու մասին համաձայնագիրը վավերացնող օրենքը և դրանց` Ռուսաստանի կազմի մեջ մտնելու ու Դաշնության նոր սուբյեկտների ինտեգրման անցումային շրջանի մասին դաշնային սահմանադրական օրենքը: Ուկրաինայի և մի շարք արևմտյան երկրների իշխանությունները հանրաքվեն ապօրինի են համարում: