8 ամսում ՀՀ-ից արտահանումն աճել է մոտ 19%-ով

PanARMENIAN.Net - Ազգային վիճակագրական ծառայությունը հրապարակել է 2016-ի հունվար-օգոստոս ընթացքում ՀՀ-ի մակրոտնտեսական ցուցանիշները, որոնց հիմնական մասով աճ է գրանցվել: Մասնավորապես, աճել է ՀՀ ներմուծումը՝ 13.4%-ով: Իսկ արտահանումը նախորդ տարվա նույն ժամանակահատվածի համեմատ ավելացել է միանգամից 36.6%-ով: Ընդհանուր առևտրաշրջանառության ոլորտում տարեկան կտրվածքով գրանցվել է 20.6% աճ:

8 ամսում ՀՀ-ից արտահանումը կազմել է մոտ $1.129 մլրդ: ՀՀ ներմուծումը կազմել է մոտ $1.985 մլրդ: Արտաքին առևտրային հաշվեկշռի բացասական սալդոն կազմել է $549 մլն:

ՀՀ արտահանումն ընդամենն աճել է 18.9%-ով, այդ թվում դեպի ՌԴ՝ 62.1%, դեպի Ուկրաինա՝ 52.1%, Բելառուս՝ 53.6%: Դեպի Չինաստան արտահանումը նվազել է 54.2%-ով, դեպի ԱՄՆ՝ մոտ 30%-ով: 5.3 անգամ ավելացել է արտահանումը դեպի ԱՄԷ:

2016-ի 8 ամսում արտաքին առևտրաշրջանառությունը կազմել է $3.114 մլրդ՝ 2015-ի նույն ժամանակահատվածի $2.978 մլրդ-ի դիմաց (ավելացել է $136 մլն-ով կամ՝ 4.3%):

ԱՊՀ երկրների հետ առևտրաշրջանառությունը նախորդ տարվա հաշվետու ժամանակաշրջանի համեմատ աճել է ավելի քան $63.7 մլն-ով (ընդ որում, դեպի ՌԴ արտահանումն աճել է $83.4 մլն-ով, փոխարենը $16մլն-ով նվազել է արտահանումը դեպի Ուկրաինա): ԵՄ-ի հետ առևտրաշրջանառությունն ավելացել է մոտ $2.8 մլն-ով:

2016-ին կտրուկ նվազել է առևտրաշրջանառությունն ԱՄՆ-ի հետ՝ $27.7 մլն-ով կամ 26.4%-ով:

Արտահանվող հիմնական ապրանքները

2016-ի առաջին 8 ամսում արտահանման առավել զգալի ծավալներ են եղել հետևյալ ապրանքային խմբերում. հանքահումքային արտադրանք` մոտ $300.2 մլն (5.2%-ի անկում), պատրաստի սննդամթերքի արտադրություն` $242.5 մլն (28.7%-ի աճ), թանկարժեք և կիսաթանկարժեք քարեր, թանկարժեք մետաղներ և դրանցից իրեր` մոտ $236.5մլն (85%-ի աճ), ոչ թանկարժեք մետաղներ և դրանցից պատրաստված իրեր` $139.1 մլն (22.1%-ի անկում)։ Մանածագործական իրերի արտահանումը կազմել է մոտ $63.8մլն` ավելանալով 59%-ով: