«Հայաստանի համար գլխավորը Լեռնային Ղարաբաղի կարգավիճակի հարցն է, առանց այդ հարցի լուծման ուրիշ որեւէ բանի մասին խոսելը ավելորդ է»,-Մորատինոսի հետ Երեւանում կայացած համատեղ մամլո ասուլիսի ժամանակ հայտարարել է ՀՀ արտգործնախարար Վարդան Օսկանյանը: Նրա խոսքերով, ղարաբաղյան հակամարտությունը սկսվեց նրանից, որ Ադրբեջանի իշխանություններրը մերժեցին Լեռնային Ղարաբաղի բնակչության ինքնորոշման իրավունքը: «Հաջորդած բոլոր իրադարձությունները` շրջափակումը, Ադրբեջանի կողմից հրահրված պատերազմը, հակամարտությունը դժվար լուծելի դարձրեցին: Ես մեկ անգամ եւս կրկնում եմ` կարգավորման հետ կապված ցանկացած հարց մենք կլուծենք Լեռնային Ղարաբաղի կարգավիճակը որոշելուց հետո միայն»,-ընդգծել է ՀՀ ԱԳՆ ղեկավարը:

Իր հերթին ԵԱՀԿ գործող նախագահը նշել է, որ երկու կողմերը հավատարիմ են հակամարտության քաղաքական լուծմանը: «Մենք հուսով ենք եւ հավատում ենք քաղաքական փոխզիջման: Ցանկացած հակամարտություն դժվար է կարգավորել, այդ թվում նաեւ ղարաբաղյան հակամարտությունը»,-ասել է Մորատինոսը, օրինակ բերելով Հարավային Օսիայի չկարգավորված հակամարտությունը: