Եվրասիական տնտեսական միությունը և Իրանը ընթացիկ տարվա դեկտեմբերի 26-ին որոշում կկայացնեն առևտրի ազատ գոտու (ԱԱԳ) ստեղծման բանակցությունների մեկնարկի մասին: Այդ մասին հայտնել է ՌԴ էներգետիկայի նախարար Ալեքսանդր Նովակը ռուս-իրանական միջկառավարական հանձնաժողովի նիստում:

Նովակը հիշեցրել է, որ Եվրասիական տնտեսական հանձնաժողովի կոլեգիայի նախագահ Տիգրան Սարգսյանը դեկտեմբերի 5-ին ՌԴ-ում Իրանի դեսպան Մեհդի Սանահիի հետ Մոսկվայում քննարկել է Իրանի և ԵՏՄ երկրների միջև առևտրի ազատ գոտու ստեղծման հարցը: Նա հավելել է, որ Իրանը գերակա երկիր է ԵՏՄ համար ԱԱԳ ստեղծման տեսակետից: «Մենք կարծում ենք, որ լուրջ ներուժ կա տնտեսական աճի խթանման համար»,-ասել է Սարգսյանը:

«Համապատասխան որոշումը նախատեսվում է ընդունել դեկտեմբերի 26-ին կայանալիք Եվրասիական բարձրագույն տնտեսական խորհրդի նիստում: Դժվար է գերագնահատել այդ համաձայնության նշանակությունը` հեռանկարում այն նոր մակարդակ դուրս կբերի ՌԴ և Իրանի միջև փոխադարձ առևտուրը»,-ասել է Նովակը, հայտնում է ՌԻԱ Նովոստին:

Նա նաև նշել է, որ ՌԴ-ն ու Իրանը 2016-ին գրեթե 80 տոկոսով ավելացրել են երկկողմ առևտրաշրջանառությունը 2015-ի համեմատ: