«Ինձ համար կարեւորագույն գերակայությունը ԼՂՀ քաղաքացիների ֆիզիկական անվտանգությունն է եւ ինքնավար պետություն ունենալու իրավունքը: Իսկ ԼՂՀ-ի ներկա փաստացի սահմանների պահպանումն ու ամրապնդումը հանդիսանում է ինչպես ԼՂՀ-ի քաղաքացիների անվտանգության ապահովման գլխավոր տարրը, այնպես եւ հանրապետության կենսագործնեության եւ անկախ պետության իրավունքի պաշտպանության»,- «Միտք» վերլուծական կենտրոնին տված հարցազրույցում հայտարարել է ԼՂՀ նախագահի թեկնածու Մասիս Մաիլյանը: Նրա խոսքերով, ԼՂՀ-ն չի կարող ինքնուրույն զարգանալ եւ ապահովել իր ռազմական եւ տնտեսական անվտանգությունը նախկին ԼՂԻՄ-ի ի սկզբանե ոչ լեգիտիմ եւ անկլավ սահմանների շրջանակներում: «Արցախի ողջ ազատագրված տարածքում անհրաժեշտ է իրականացնել համակարգված վերականգնում եւ բնակեցում: Ազատագրված տարածքների բնակեցումը հանդիսանում է Արցախի եւ ողջ հայության համար ազգային, պետական եւ բարոյական հրամայականը, եւ բնակցման ներկա տեմպերն ու ռազմավարությունը պետք է անարդյունավետ գնահատել»,- նշել է նա:

Մաիլյանը նաեւ ընդգծել է, որ ԼՂՀ-ի եւ Ադրբեջանի միջեւ տարածքային սահմանագծման խնդիր կա: «Սակայն այն կարող է արդիական դառնալ միայն Ադրբեջանի կողմից ԼՂՀ-ի ճանաչման դեպքում: Տարածքային խնդրի շուրջ այսօր ստեղծված անորոշությունը չի կարող որեւէ արդարացում ունենալ»,- գտնում է ԼՂՀ նախագահի թեկնածուն: