Ստամբուլում կայացել է Սեւծովյան տնտեսական համագործակցության (ՍԾՏՀ) անդամ երկրների Տրանսպորտի նախարարների հանդիպումը, որի ընթացքում մասնակիցները մտքեր են փոխանակել Սեւծովյան տարածաշրջանում տրանսպորտի բնագավառում տեղի ունեցած զարգացումների վերաբերյալ` ընդգծելով այս ուղղությամբ համագործակցության ընդլայնման կարեւորությունը ՍԾՏՀ երկրների զարգացման համար: ՀՀ պատվիրակությունը կոնֆերանսին ղեկավարել է ՀՀ տրանսպորտի նախարարի առաջին տեղակալ Հրանտ Բեգլարյանը, ով հանդես է եկել Հայաստանի տրանսպորտի ոլորտում առկա զարգացումները ներկայացնող զեկույցով` անդրադառնալով այդ բնագավառում առկա դրական տեղաշարժերին եւ իրականցվելիք բարեփոխումներին:

Հանդիպման ավարտին ընդունվել է Հռչակագիր, ուր կարեւորվում են տարածաշրջանում տրանսպորտային համակարգերի զարգացումը, այդ ուղղությամբ համագործակցության հետագա սերտացումը, բեռնափոխադրումների համար նպաստավոր պայմանների ապահովումը եւ ՍԾՏՀ կազմակերպության առավել արդյունավետ համագործակցությունը միջազգային տրանսպորտային կազմակերպությունների եւ կառույցների հետ, հաղորդում է ՀՀ ԱԳՆ մամլո ծառայությունը: