ՌԴ դեսպանի սպանության պատասխանատվությունը ստանձնել են սիրիացի գրոհայինները

PanARMENIAN.Net - Թուրքիայում ՌԴ դեսպան Անդրեյ Կարլովի սպանության պատասխանատվությունը ստանձնել է սիրիական «Ջեյշ ալ Ֆաթհ» զինյալ կոալիցիան: Այդ մասին հայտնել է իրաքյան «Աս Սումարիա» հեռուստաալիքը գրոհայինների տարածած հայտարարության վրա հղումով, գրում է Meduza-ն:

Դեկտեմբերի 19-ին Թուրքիայի մայրաքաղաք Անկարայում կրակել են Ռուսաստանի դեսպան Անդրեյ Կարլովի վրա, երբ վերջինս ելույթ էր ունենում ժամանակակից արվեստի կենտրոնում՝ «Ռուսաստանը թուրքերի աչքերով» ցուցահանդեսի բացման ժամանակ: Դեսպանը մահացել է:

Կարլովի սպանությունն, ըստ հայտարարության, «առաջին վրեժխնդրությունն է Հալեպի կանանց, երեխաների ու ծերունիների, ինչպես նաև ամբողջ աշխարհում մահմեդականների հեղվող արյան համար»:

Ինչպես ասվում է հայտարարության մեջ, դեսպանին սպանած Մևլութ Ալթինթաշը վերոնշյալ կազմակերպության անդամ է:

Կարլովի վրա կրակած 22-ամյա Մևլութ Մերթ Ալթինթաշը ծառայում էր ոստիկանությունում, սակայն դեսպանի վրա հարձակման օրը իր պարտականությունները կատարելիս չի եղել: Նա սպանվել է հատուկ գործողության արդյունքում: ՌԴ ԱԳՆ-ն կատարվածն ահաբեկչություն է անվանել և նշել, որ Մոսկվան այդ հարցը կբարձրացնի ՄԱԿ ԱԽ-ում:

Հայտարարության իսկությունը պարզել հնարավոր չէ:

«Ջեյշ ալ Ֆաթհ» («Նվաճման բանակ») զինյալ կոալիցիան ստեղծվել է 2015-ին Իդլիբ գավառում: Կոալիցիայի կազմում են ընդգրկվել Սիրիայի կառավարական զորքերի դեմ կռվող խմբավորումները: Կոալիցիայի կազմում են նաև «Ֆրոնտ ան Նուսրան» և «Ալ Քայիդայի» սիրիական բաժանմունքը: