ՆԱՏՕ-ն ընկալում է Վրատանը որպես ամբողջական պետություն նախկին Վրացական ԽՍՀ սահմաններում: Այդ մասին PanARMENIAN.Net-ի թղթակցին է հայտարարել ՆԱՏՕ-ի պաշտպանության քաղաքականության եւ ծրագրման դեպարտամենտի պաշտպանական համագործակցության բաժնի պետ Ջորջ Կատսիրդակիսը: Նրա խոսքերով, եթե Վրաստանն իրոք ցանկանում է Դաշինքի լիիրավ անդամ դառնալ, նա պետք է երկխոսություն վարի Աբխազիայի եւ Հարավային Օսեթիայի հետ եւ լուծի հակամարտությունները խաղաղ ճանապարհով: «Եթե Վրատանը համաձայնության հասնի եւ ՆԱՏՕ-ին լիիրավ անդամակցելու հայտ ներկայացնի, կսկսվի անդամակցության իրականացման ծրագիրը (Membership Action Plan - MAP), որն ուղղված է երկրի զինված ուժերը ՆԱՏՕ-ի չափանիշներին համապատասխանեցնելուն»,-նշել է Կատսիրդակիսը: Ինչ վերաբերում է Ադրբեջանի ՆԱՏՕ-ին անդամակցելու հավանականությանը, ապա նրա խոսքերով, Բաքուն դեռեւս Դաշինքին անդամակցելու ցանկություն չի հայտնել: «Այն դեպքում, եթե Ադրբեջանը ցանկանա անդամակցել ՆԱՏՕ-ին, նրան նույն պահանջները կներկայացվեն, ինչ Վրաստանին: Ադրբեջանը պետք է նորմալացնի հարաբերությունները Հայաստանի հետ եւ կարգավորի ղարաբաղյան հակամարտությունը»,-ընդգծել է ՆԱՏՕ-ի ներկայացուցիչը:

Նշենք, որ ըստ ՆԱՏՕ-ի կանոնադրության Դաշինքի անդամ կարող է դառնալ միայն այն երկիրը, որն իր տարածքում հակամարտություն չունի: