ԱՄՆ-ն կաջակցի Ուկրաինայի ԶՈւ հզորացմանը

16 փետրվարի 2017 - 11:23 AMT

PanARMENIAN.Net - ԱՄՆ-ն նախկինի պես միտված է լուրջ աջակցություն ցուցաբերելու Ուկրաինայի զինված ուժերին` ներուժը հզորացնելու հարցում: Այդ մասին հայտարարել է Պենտագոնի պաշտոնական ներկայացուցիչ Քորթնի Հիլսոնը:

ԱՄՆ պաշտպանության նախարարի առաջին տեղակալ Բոբ Ուորքը Պենտագոնում հանդիպել է Ուկրաինայի ԱԳ նախարար Պավել Կլիմկինի հետ և քննարկել է ԱՄՆ կողմից ցուցադրվելիք աջակցությունը, որն ուղղվելու է Ուկրաինայի ռազմական ներուժի հզորացմանը: «Ուորքը շեշտել է, որ ԱՄՆ-ն նախկինի պես միտված է լրջորեն սատարելու Ուկրաինայի անկախությանն ու տարածքային ամբողջականությանը: Բացի այդ, նա կոչ է արել Ուկրաինային հավատարիմ մնալ բարեփոխումներին, որոնք կյանքի կոչելուց հետո նրա պաշտպանական ձեռնարկությունների արդյունավետությունը կարող է բարձրանալ»,-ասվում է պաշտոնական ներկայացուցչի հայտարարության մեջ, հայտնում է ՌԻԱ Նովոստին:

Ըստ Պենտագոնի հայտարարության, Կլիմկինը Ուորքի հետ հանդիպման ժամանակ հաստատել է, որ Ուկրաինան հավատարիմ է Դոնբասում հակամարտության կարգավորմանն ուղղված Մինսկի համաձայնագրերի կատարմանը:

Փետրվարի 15-ին ԱՄՆ նախագահ Դոնալդ Թրամփի մամուլի քարտուղար Շոն Սփայսերը հայտարարել է, որ նախագահն ակնկալում է, որ Ռուսաստանը կմարի հակամարտության սրացումն Ուկրաինայում և կվերադարձնի Ղրիմը:

2017-ի հունվարին ՌԴ նախագահի մամուլի քարտուղար Դմիտրի Պեսկովը հայտարարեց, որ Ղրիմի, կամ ՌԴ այլ տարածաշրջանի կարգավիճակի հարցը չի կարող սակարկության առարկա լինել Մոսկվայի համար:

Հղումներ թեմայով.

Ria.ru: США настроены поддерживать наращивание потенциала вооруженных сил Украины

Sputnik. US Remains ‘Strongly Supportive’ to Building Capacity of Ukraine’s Army