Նոր քիմիական գրոհ սիրիական Իդլիբում. Ավելի քան 70 զոհ կա

5 ապրիլի 2017 - 14:06 AMT

PanARMENIAN.Net - Սիրիական Իդլիբում ենթադրյալ քիմիական գրոհի արդյունքում զոհվածների թիվը հասել է 72-ի: Ողբերգության զոհերի թվում Հան Շեյհուն քաղաքում 20 երեխա և 17 կին կա: Այդ մասին հայտնել է Մարդու իրավունքների դիտարկման սիրիական կենտրոնը:

Իրավապաշտպանները զգուշացրել են, որ զոհերի քանակը կարող է աճել, քանի որ որոշ մարդիկ անհետ կորած են համարվում, իսկ Հան Շեյհունն ապրիլի 5-ի առավոտյան ռմբակոծվել է օդից, գրում է Deutsche Welle-ն:

ԱՄՆ-ն, Ֆրանսիան, Մեծ Բրիտանիան պատասխանատվությունը բարդել են Սիրիայի կառավարության վրա: Ռուսաստանը, սակայն, հայտարարում է, որ սիրիական ավիացիան ռմբակոծել է ԻՊ պատկանող քիմիական ռազմամթերքի պահեստը: Ջիհադականները, որոնք վերահսկում են Իդլիբ գավառը, խոստացել եմ վրեժխնդիր լինել ռմբակոծության համար:

Ապրիլի 4-ին հայտնի դարձավ, որ առնվազն 58 մարդ է զոհվել «թունավոր գազից»:

Ավելի վաղ հայտնի դարձավ, որ Սիրիայում ռազմական նպատակով քիմիական նյութերի կիրառման դեպքերի հետաքննության ՄԱԿ և ՔԶԱԿ համատեղ մեխանիզմը պատասխանատու է համարում Սիրիայի կառավարությանը սեփական տարածքում քիմիական գրոհի համար:

2014-ի հունիսին Սիրիայի իշխանությունները քիմզենքի վերջին պաշարները բեռնեցին ՔԶԱԿ նավերի վրա: Սիրիան համաձայնվեց ոչնչացնել քիմզենքի պաշարների ԱՄՆ և դաշնակիցների կողմից ուժի կիրառման սպառնալիքի տակ: 2015-ի փետրվարի 2-ին ՌԴ-ն հայտարարեց Սիրիայի լիակատար քիմիական զինաթափման մասին` Դամասկոսը Մոսկվայի և Վաշինգտոնի միջնորդությամբ դարձավ ՔԶԱԿ անդամ և ոչնչացրեց իր քիմիական զինանոցը:

Հղումներ թեմայով.

Reuters. Warplanes mount fresh airstrikes in Idlib area: Syrian Observatory

Deutsche Welle: Число жертв газовой атаки в Сирии превысило 70 человек