Քոնդոլիզա Ռայսը կրկին կոչ է արել չընդունել Հայոց ցեղասպանության մասին բանաձեւը

PanARMENIAN.Net - ԱՄՆ-ի պետքարտուղար Քոնդոլիզա Ռայսը երեկ կրկին ամերիկացի օրենսդիրներին կոչ է արել չընդունել Հայոց ցեղասպանությունը ճանաչող թիվ 106 բանաձեւը: «Այժմ շատ զգայուն ժամանակաշրջան է Թուրքիայի հետ հարաբերություններում», - հայտարարել է Ռայսը Ներկայացուցիչների պալատի արտաքին գործերի հանձնաժողովում, որը երկու շաբաթ առաջ հավանություն է տվել բանաձեւին: «Մենք ծայրաստիճան կարեւոր ռազմավարական շահեր ունենք` կապված թուրքերի հետ», - ասել է Ռայսը` կոչ անելով Ներկայացուցիչների պալատին չքվեարկել բանաձեւը: Ընդունելով հանդերձ, որ տեղի են ունեցել «ահավոր իրադարձություններ», «զանգվածային ջարդեր», պետքարտուղարը հավելել է, թե դրանք պատահել են Օսմանյան կայսրությունում, իսկ ներկայիս թուրքական պետությունը «օսմանցիները չեն»:



«Ես շարունակում եմ մնալ այն կարծիքին, որ Հայոց ցեղասպանության բանաձեւի ընդունումը լրջորեն կվնասի Թուրքիայի հետ մեր հարաբերությունները», - ասել է Ռայսը, հավելելով թե կոչ է արել ինչպես հայերին, այնպես էլ թուրքերին` միասին աշխատել պատմական տարաձայնությունները հաղթահարելու ուղղությամբ, հաղորդում է «Ազատություն» ռադիոկայանը: