Պալմիրայի համար մարտերում ևս 2 ռուս մարտիկ է զոհվել:Այդ մասին հայտնում է Reuters-ը:

Զոհվել են 41-ամյա Ալեքսեյ Սաֆոնովը (մարտի կեսին) և 46-ամյա Վլադիմիր Պլյուտինսկին (փետրվարի սկզբին): Այդպիսով, ըստ պարբերականի, ռուսների զոհերի թիվը Պալմիրայում հունվարի վերջից մինչև մարտի վերջն ընկած հատվածում հասել է 21-ի: ՌԴ ՊՆ-ն պաշտոնապես հայտնել է 5 զոհի մասին:

Սաֆոնովը հուղարկավորվել է Ռոստովի շրջանում: Նրա հարազատներից մեկը, հարևանները և տեղացի պաշտոնյան հաստատել են, որ նա զոհվել է Սիրիայում: Մահվան հանգամանքները հայտնի չեն: Ըստ պարբերականի, վերջին շրջանում նա չի եղել ՌԴ բանակի կազմում, գրում է Deutsche Welle-ն:

Պլյուտինսկին Կրասնոդարի երկրամասից է, նա սպանվել է սիրիական Թաիսում, որը Պալմիրայից ոչ հեռու է գտնվում: Նրա բարեկամուհին հայտնել է, որ մահվան պահին նա ՌԴ ԶՈւ շարքերում չի ծառայել:

Reuters-ը հիշատակում է նաև 27-ամյա Միխայիլ Նեֆեդովին, որը սպանվել է Սիրիայում փետրվարին, նա ևս ՌԴ ԶՈւ կազմում չի եղել, հանդիսացել է մասնավոր ռազմական ընկերության անդամ:

Ավելի վաղ ԶԼՄ-ները արդեն գրել են, որ Սիրիայում ռուսական ստորաբաժանումների կազմում պայքարում են ոչ միայն զինծառայողներ, այլ նաև մարդիկ, որոնք աշխատում են մասնավոր ռազմական ընկերություններում: Նրանք համարվում են քաղաքացիական անձինք, թեև մասնակցում են ռազմական գործողություններին զինվորական հրամանատարության ենթակայությամբ: ՌԴ ՊՆ-ն պաշտոնապես չի հաստատում դա և չի հրապարակում նրանց շարքերում կորուստների մասին տվյալները: