Ըմբշամարտի ԵԱ. Ալեքսանյանը կպայքարի բրոնզի համար

PanARMENIAN.Net - Սերբիայի Նովի Սադ քաղաքում ընթացքող հունահռոմեական ոճի ըմբշամարտի Եվրոպայի առաջնությունում 98 կգ քաշային կարգում Արթուր Ալեքսանյանը կպայքարի բրոնզե մեդալի համար:

98 կգ քաշային կարգում, քառորդ եզրափակչում Արթուր Ալեքսանյանը զիջեց Նորվեգիայի ներկայացուցիչ Ֆելիքս Բալդաուֆին:

Քառորդ եզրափակչում Ալեքսանյանի մրցակից Ֆելիքս Բալդաուֆը (Նորվեգիա) անցել է եզրափակիչ, արդյունքում Ալեքսանյանը սփոփիչ գոտեմարտ է անցկացրել և հաղթել Արթուր Օմարովին (Չեխիա):

Ալեքսանյանը երրորդ տեղի համար կմրցի Դմիտրի Տիմչենկոյի (Ուկրաինա) հետ, տեղեկացնում է ՀՀ Ազգային օլիմպիական կոմիտեն:

130 քաշային Վաչիկ Եղիազարյանին քառորդ եզրափակչում հաղթած Բալինտ Լամը (Հունգարիա) դուրս է եկել եզրափակիչ և հայ ըմբիշը սփոփիչ գոտեմարտի հնարավորություն է ստացել: Սակայն, Եղիազարյանը պարտվել է Վիտալի Շչուրին (Ռուսաստան) և դուրս մնացել հետագա պայքարից:

59 կգ Գևորգ Ղարիբյանը և 66 կգ Կարեն Ասլանյանը սփոփիչ գոտեմարտերի հնարավորություն չունեցան, քանի որ նրանց հաղթած ըմբիշները չհասան եզրափակիչ:

Հայ ազատ ոճի ըմբիշները երեք բրոնզե մեդալ են նվաճել Եվրոպայի առաջնությունում։