ԱՄՆ հետախուզություն. 2017-ին ԼՂ-ում լայնածավալ ռազմական գործողությունների վերսկսման վտանգ կա

PanARMENIAN.Net - 2017-ին ղարաբաղյան հակամարտության գոտում լայնածավալ ռազմական գործողությունների վերսկսման վտանգ կա: Այդ մասին զգուշացնում է ԱՄՆ Ազգային հետախուզության տնօրեն Դենիել Ռ.Քոութսը մայիսի 11-ի զեկույցում:

Զեկույցում ասվում է, որ լարվածությունը Հայաստանի և Ադրբեջանի միջև Ղարաբաղի պատճառով կտրուկ սրվեց 2016-ի ապրիլին, իսկ երկու կողմերի փոխզիջման չգնալն ու ներքին ճնշման աճը հանրապետություններում վկայում են, որ 2017-ին լայնածավալ ռազմական գործողությունների հավանականությունը կպահպանվի:

«Տևական տնտեսական դժվարություններն Ադրբեջանում կարող են մարտահրավեր հանդիսանալ ռեժիմին և ավելացնել իշխանությունը պահպանելու համար այլախոհների ճնշումները: Երկիրը կփորձի հավասարակշռել հարաբերությունները ՌԴ, Իրանի և Արևմուտքի հետ»,-ասվում է Քոութսի զեկույցում:

2016-ի ապրիլի 2-ի վաղ առավոտյան, Ադրբեջանը լայնամասշտաբ ռազմական գործողություն սանձազերծեց Արցախի Հանրապետության հետ շփման գծի ամբողջ երկայնքով: Առճակատումը տևեց 4 օր՝ հետագայում ստանալով Քառօրյա պատերազմ կամ Ապրիլյան պատերազմ անվանումը։ Առավել թեժ մարտեր են ընթացել ռազմաճակատի վերածված առաջնային գծի հարավային՝ Հադրութի, և հյուսիսարևելյան՝ Մարտակերտի ուղղություններով։Ադրբեջանական կողմը լայնածավալ հարձակողական գործողություններում կիրառեց իր զինանոցում եղած ռազմական տեխնիկայի գրեթե բոլոր հնարավոր տեսակները։

Ապրիլի 2-5-ն ընթացած մարտական գործողությունների ընթացքում հայկական կողմի կորուստները կազմել են 64 զինծառայող, 13 կամավորական, 4 քաղաքացիական անձ (81 կորուստ) և 120-ից ավել վիրավոր (ևս 9 զինածայող զոհվել և մահացել էր պատահարների արդյունքում ակտիվ մարտական գործողությունների դադարեցումից հետո, մինչև ապրիլի 13-ը ընկած ժամանակահատվածում, մի քանիսը՝ մահացել ավելի ուշ, հոսպիտալներում): Պետդեպի հայտնած տվյալներից հետևում է, որ, 81 հայկական զոհերից բացի, մոտ 270 ադրբեջանցի զոհ է եղել: