Լապշինը Բաքվի մեկուսարանում հանդիպել է մոր հետ

PanARMENIAN.Net - Բաքվի մեկուսարանում կալանքի տակ պահվող հայտնի ռուսաստանցի բլոգեր Ալեքսանդր Լապշինը, որը ձերբակալվելով Մինսկում արտահանձնվել է Ադրբեջան, հանդիպել է մոր հետ: Ըստ փաստաբան Էդուարդ Չերնինի, հանդիպումը տեղի է ունեցել մեկուսարանի բուժկետում:

Ըստ փաստաբանի, Բելլա Լապշինան Բաքու է ժամանել քննության ընթացքով հետաքրքրվելու և որդու ինքնազգացողության մասին տեղեկանալու նպատակով: Նրան իրազեկել են, որ քննությունն իր որդու գործով ավարտվել է, հայտնում է Trend.az-ը:

Փաստաբանը հավելել է նաև, որ քրգործով քննությունն ավարտված է, գործը գտնվում է ուսումնասիրման փուլում, հետո նյութերը կուղարկվեն դատարան:

2016-ի դեկտեմբերին բլոգեր Ալեքսանդր Լապշինին ձերբակալել են Մինսկում Ադրբեջանի հարցումով, որտեղ նա ընդգրկված է «սև ցուցակում» ԼՂՀ այցելելու համար: ԼՂՀ այցելած անձանց համար մուտքն Ադրբեջան արգելված է: Այնուամենայնիվ, 2015-ի հունիսին Լապշինը մուտք է գործել Ադրբեջան Վրաստանի տարածքից ուկրաինական անձնագրով: Նրան հաջողվել է անցնել սահմանային հսկողությունը և հայտնվել Բաքվում, քանի որ ուկրաինական անձնագրում Ալեքսանդր անունը գրված էր «Օլեքսանդր»: Դրանից հետո Ադրբեջանը բլոգերի միջազգային հետախուզոմ էր հայտարարել «Պետական սահմանի մասին» օրենքը և երկրի միգրացիոն օրենսդրությունը խախտելու համար: ՌԴ ԱԳՆ-ն հայտարարել է, որ ՌԴ քաղաքացու արտահանձնումը երրորդ երկիր անթույլատրելի է:

ՌԴ-ն ու Իսրայելը դեմ էին բլոգերի արտահանձնմանը, սակայն դիվանագետների ջանքերն արդյունք չտվեցին և փետրվարի 7-ին նա արտահանձնվեց Բաքու:Ադրբեջանական դատարանն ապրիլի 7-ին 3 ամսով երկարաձգել է Բաքվի հարցումով Մինսկում ձերբակալված և Ադրբեջանին արտահանձնված ռուսաստանցի բլոգեր Ալեքսանդր Լապշինի կալանքը: