Թուրքիայի քրդաբնակ շրջաններում 218 անգամ պարետային ժամ է հայտարարվել 2 տարում

2 հունիսի 2017 - 19:04 AMT

PanARMENIAN.Net - Թուրքիայի Մարդու իրավունքների հիմնադրամը զեկույց է կազմել արևելյան և հարավարևելյան քրդաբնակ շրջաններում պետության կողմից հայտարարված պարետային ժամերի վերաբերյալ:

Զեկույցից պարզ է դարձել, որ 2015-ի օգոստոսի 15-ից մինչև 2017-ի հունիսի 1-ը նշյալ շրջանների 10 քաղաքում ու 43 շրջաններում ընդհանուր առմամբ 218 անգամ պարետային ժամ (փողոց դուրս գալու արգելք) է հայտարարվել:

Ցուցակի առաջին տեղում քրդերի կենտրոնը համարվող Դիարբեքիրի նահանգն է՝ 127 անգամ: Դիարբեքիրին հաջորդում են Մարդինը (32 անգամ), Հաքքարին (20), Շըրնաքը (13), Բիթլիսը (8), Բինգյոլը (5), Դերսիմը (5), Մուշը (4), Բաթմանը (3), Էլյազըղը (1), Diken.com.tr-ին հղումով գրում է Ermenihaber.am-ը:

Հաշվետվության մեջ նշվում է, որ սահմանափակումների հետևանքով խախտվել է առնվազն 1.8 մլն բնակչի կյանքի ու առողջության հիմնական իրավունքները:

Պարետային ժամերի վերաբերյալ ևս մեկ զեկույց հրապարակել է Թուրքիայի Մարդու իրավունքների ասոցիացիան, որտեղ խոսվում է միայն 2016 թվականին 300 հազար աշակերտների կրթության իրավունքի ոտնահարման և 500 հազար մարդու ներքին գաղթի ենթարկելու մասին:

Վերջին անգամ պարետային ժամ է հայտարարվել մայիսի 30-ին, Դիարբեքիրի նահանգի Լիջե, Դիջլե, Հանի, և Քոջաքյոյ շրջանների 43 գյուղերում: Այսօր՝ հունիսի 2-ին հայտարարվել է պարետային ժամի ավարտի մասին:

Հղումներ թեմայով.

Վերջին 2 տարում Թուրքիայում քրդաբնակ շրջաններում 218 անգամ պարետային ժամ է հայտարարվել. Ermenihaber.am