Հայաստանում մոտ 52.000 աշխատող երեխա կա: Տվյալները 2016 թվականի դեկտեմբերին հրապարակել է ԱՎԾ-ն, Աշխատանքի միջազգային կազմակերպության հետ համատեղ, 2015 թվականի ընթացքում կատարված ուսումնասիրությունների արդյունքում: Այս մասին ասել է ՀՀ մարդու իրավունքների պաշտպանի աշխատակազմի, Երեխաների իրավունքների պաշտպանության վարչության պետ Էդուարդ Իսրայելյանը, գրում է Aysor.am-ը:

ԱՎԾ-ի հետազոտությանը մասնակցել է 5-17 տարիքային խմբի 453 հազար երեխա, որի 9%-ը կամ 39,300 երեխա ընդգրկված է եղել երեխայի համար արգելված համարվող աշխատանքում:

ՄԻՊ-ի 2016 թվականի տարեկան զեկույցում, որտեղ հղում է կատարվում ԱՎԾ-ի հրապարակմանը, մասնավորապես գրված է. «Առավել խոցելի են եղել գյուղաբնակ երեխաները, քանի որ ընթացիկ զբաղվածություն ունեցող երեխաների 88 տոկոսը եղել են գյուղաբնակ: Մտահոգիչ է վնասակար աշխատանքի պատճառով աշխատող երեխաների ստացած վնասվածքների փաստը (հենաշարժիչ համակարգին և վերջույթներին հասցված վնասվածքները տղաների մոտ կազմել են դեպքերի 6.2 տոկոսը, իսկ աղջիկների մոտ այն կազմում է գրեթե երկու անգամ ավելի` 11.2 տոկոսը): Հետազոտության տվյալները վկայում են նաև երեխաների դպրոց հաճախելիության մակարդակի և զբաղվածության միջև ակնհայտ փոխադարձ կապի մասին, ընդ որում՝ հատկապես արտահայտված երեխայի արգելված և վնասակար համարվող աշխատանքների առումով (չաշխատող երեխաներն ունեցել են դպրոց հաճախելիության ավելի բարձր մակարդակ, քան աշխատող երեխաները (95.2 տոկոս և 92.8 տոկոս)»:

Էդուարդ Իսրայելյանը հայտնել է, որ այս ոլորտը վերահսկող հստակ մարմին չկա, և դա «օրենսդրական բաց է»: Նրա խոսքով՝ իրենց ինստիտուտը ունի լիազորություններ միայն այն դեպքում, երբ տեղի է ունեցել երեխաների իրավունքների խախտում և այն չի արձանագրվել պետական կամ ՏԻՄ մարմինների կողմից:

«Նախկինում կար աշխատանքի պետական տեսչություն, որը ժամանակին ուներ աշխատող երեխաների խնդիրներով զբաղվելու լիազորություն, բայց այլևս նման հարցերով զբաղվող տեսչություն չկա, ինչը նշանակում է, որ այս ոլորտը մեզ մոտ բաց է. օրենսդրական խնդիր կա», - նշել է նա:

Հունիսի 12-ը Երեխաների ծանր աշխատանքի դեմ պայքարի համաշխարհային օրն էր։