Ձմեռային օլիմպիական խաղերում Հայաստանը կարող է 3-7 մասնակից ունենալ

Ձմեռային օլիմպիական խաղերում Հայաստանը կարող է 3-7 մասնակից ունենալ

PanARMENIAN.Net - 23-րդ Ձմեռային օլիմպիական խաղերում Հայաստանը կարող է ունենալ 3-7 մասնակից։ 7 մարզաձևերից Հայաստանը ներկայացուցիչ կարող է ունենալ միայն երկուսում՝ դահուկասպորտ և գեղասահք։

Հարավային Կորեայում 23-րդ Ձմեռային օլիմպիական խաղերի մեկնարկին մնում է 98 օր։ Մի քանի հազար մարզիկ Փհենչհան-2018-ում կպայքարի յոթ մարզաձևի 15 մրցաձևում՝ գեղասահք, կյորլինգ, դահուկային սպորտ, բիաթլոն, հոկեյ, բոբսլեյ, սահնակային սպորտ:

Դահուկավազորդ Սերգեյ Միքայելյանը գրեթե ապահովել է մասնակցությունն օլիմպիական խաղերում։ Այս պահին նա վարկանիշային աղյուսակում 299-րդն է, իսկ ուղեգիր ստանալու համար Սերգեյը պետք է լինի 300 լավագույնների շարքում։ Նա իր վարկանիշով օլիմպիական խաղերի դուռը բացում է նաև թիմակիցների համար, հայտնում է ՀԱՕԿ լրատվականը։

Միքայել Միքայելյանին մի քանի քայլ է բաժանում Փհենչհան-2018-ից։ Նրա միավորները պետք է լինեն 100-ից պակաս, առավելագույնը՝ 99: Այժմ Միքայելն ունի 105 միավոր։

Ներկայիս 115 միավորով վարկանիշին մոտ է նաև Թադևոս Պողոսյանը։

Դահուկավազքի կանանց հավաքականի համար ունենք «սպիտակ քարտի» ակնկալիք՝ մեկ մարզիկի մասնակցության թույլտվություն։ Հնարավոր է նաև մեկ ուղեգիր՝ լեռնադահուկային սպորտում։

Փհենչհան-2018-ում մասնակցությունը հաստատելու համար հայ դահուկորդների տրամադրության տակ մի քանի վարկանիշային մրցաշարեր կան։ Հունվարի 22-ին Դահուկասպորտի միջազգային ֆեդերացիան կհայտարարի, թե որ մարզիկներն են նվաճել ուղեգրեր։

Գեղասահքում գործերն ավելի բարդ են։ Աշխարհի ու Եվրոպայի առաջնություններում, միջազգային մրցաշարերում հայ գեղասահորդներին չհաջողվեց օլիմպիական ուղեգիր նվաճել։ Գերմանիայում կայացած վերջին վարկանիշային մրցաշարից հետո Հայաստանի գեղասահքի ֆեդերացիայի նախագահ Մելանյա Ստեփանյանը նշեց, որ հայ մարզիկներին պարզապես չթողեցին օլիմպիական խաղեր։

Մենասահորդ Անաստասիա Գալուստյանը և Թինա Կարապետյան/Սիմոն Պրու Սենեկալ պարային զույգն առաջին պահեստային են համարվում։ Նրանք կկարողանան հանդես գալ Փհենչհան-2018-ում, եթե ուղեգիր ունեցողներից մեկն այս կամ այն պատճառով չկարողանա մասնակցել։

 Ուշագրավ
Ավելի վաղ եզրափակիչ էին դուրս եկել Արթուր Ավետիսյանն ու Վահագն Դավթյանը
Ազատ ոճի ըմբշամարտի Հայաստանի պատանեկան հավաքականը թիմային հաշվարկում զբաղեցրել է 3-րդ հորիզոնականը
Հավանայում կայացել է Ծանրամարտի միջազգային ֆեդերացիայի նիստը
---