Երևանի քաղաքապետարանի ենթակայության մանկապարտեզների աշխատակիցները կօգտվեն առողջապահական ապահովագրության փաթեթով նախատեսված ծառայություններից:
Երևանի քաղաքապետարանում կայացած աշխատանքային խորհրդակցության ժամանակ, որը վարել է քաղաքապետ Տարոն Մարգարյանը, քաղաքապետի տեղակալ Վահե Նիկոյանը զեկուցել է, որ ի կատարումն Երևանի քաղաքապետի հանձնարարականի` 2018 թվականի հունվարի 1-ից, ի թիվս համայնքային ծառայողների ու քաղաքապետարանի ենթակայության մի շարք կազմակերպությունների աշխատակիցների, համայնքային ենթակայության մանկապարտեզների 4700 աշխատակից ևս կօգտվի առողջապահական ապահովագրության փաթեթով նախատեսված ծառայություններից:
Քաղաքապետարանի ենթակայության կառույցների աշխատակիցներին առողջապահական ապահովագրության փաթեթներով ապահովելու գործընթացի շրջանակներում համայնքային շախմատի դպրոցների մոտ 170 աշխատակիցներ ևս հունվարի 1-ից հնարավորություն ունեն օգտվելու վերոնշյալ փաթեթով նախատեսված ծառայություններից, հայտնում է քաղաքապետարանի մամուլի ծառայությունը:
2017-ի հոկտեմբերի 1-ից գործում է սոցիալական փաթեթի շահառուների պետության կողմից երաշխավորված անվճար և արտոնյալ պայմաններով բժշկական օգնություն և սպասարկում ստանալու նոր կարգը: Շահառուին ցուցաբերված բժշկական օգնության դիմաց հատուցումն իրականացվում է անմիջապես բժշկական կազմակերպությանը համապատասխան գումարներ վճարելու միջոցով: Ապահովագրության պայմանագրով շահառուին ցուցաբերվող բժշկական օգնության գծով տարեկան ընդհանուր կարող է առավելագույնը վճարվել 10 մլն ՀՀ դրամ:
