ՀՀ կառավարությունը «Աշխատանքային օրենսգրքում» նախատեսվող փոփոխություններով մտադիր է հաշմանդամության զինվորական կենսաթոշակի իրավունք ունեցող նախկին զինծառայողներին և զոհված (մահացած) զինծառայողների ընտանիքների անդամներին հաստիքների կրճատման դեպքում աշխատանքում մնալու նախապատվություն տալ՝ հավասար որակավորման դեպքում:
Համապատասխան որոշման նախագիծը քննարկվել է գործադիրի հունվարի 11-ի նիստում:
Ըստ նախագծի հիմնավորման՝ գործող օրենսգիրքը գործատուի կողմից աշխատողների թվաքանակը կրճատելու, ինչպես նաև հավասար որակավորման կամ արտադրողականության պարագայում, աշխատանքում մնալու նախապատվության չի նախատեսում հայրենիքի պաշտպանության համար զոհված կամ առողջությունը կորցրած` հաշմանդամություն ունեցող զինծառայողների ընտանիքի անդամների համար:
«Նման մոտեցումն արդարացի համարվել չի կարող, քանի որ զինծառայողի ընտանիքի անդամի աշխատանքը կորցնելու հետևանքով ընտանիքը կարող է հայտնվել սոցիալական ծանր պայմաներում: Այս մոտեցումը չի բխում սոցիալական, ինքնիշխան պետության, ինչպես նաև «Ազգ-բանակ» հայեցակարգի բովանդակությունից», -ասվում է հիմնավորման մեջ:
