Ալիևը Բերդիմուհամեդովից շատ գիրք է «գրել»

PanARMENIAN.Net - Փետրվարի 8-ին լույս է տեսել Ադրբեջանի նախագահ Իլհամ Ալիևի բազմահատորյակի 53-րդ գիրքը՝ «Իլհամ Ալիև. Զարգացումն է մեր նպատակը»:

53-րդ գրքում հավաքված նյութերը ներառում են 2012թ. սեպտեմբեր-հոկտեմբեր ժամանակաշրջանը: Գրքում հավաքված են Ալիևի աշխատանքային այցերի, բանակցությունների, հայտարարությունների, ստորագրված փաստաթղթերի, այլ երկրների նախագահների հետ հանդիպումների, ընդունելությունների մասին նյութերը:

Գրքերը լույս են տեսնում զարմանալի արագությամբ և պարբերականությամբ՝ փետրվարի 7-ին լույս էր տեսել 52-րդ հատորը, փետրվարի 6-ին՝ 51-րդը: Ընդհանուր առմամբ, 2012-ի սեպտեմբերից ի վեր լույս է տեսել Ալիևի բազմահատորյակի 11 հատոր: Ալիևի բոլոր գրքերում նկարագրված են այն քաղաքական իրադարձությունները, որոնց նա մասնակցել է:

Ադրբեջանի նախագահին հաջողվել է նույնիսկ գերազանցել Թուրքմենստանի նախագահ Ղուրբանգուլի Բերդիմուհամեդովին, որի հաշվին 40 գիրք կա: Բերդիմուհամեդովն իր գրքերում ավելի լայն թեմաների է անդրադառնում՝ գրելով ԶՈւ, դեղաբույսերի, թեյի, թուրքմենական ավանդույթների և «երջանիկ կյանքի» մասին: Միայն 2016-ին Թուրքմենստանի նախագահը 7 գիրք է գրել:

Թուրքմենստանի դպրոցներում ուսուցիչներից և աշակերտներից պահանջում են մեջբերումներ անել Բերդիմուհամեդովի գրքերից: