Հայաստանում հնագիտական պեղումների մասին սերիալ կնկարահանվի

PanARMENIAN.Net - ՀՀ Մշակույթի նախարարությունը և հայկական հեռուստաընկերություններից մեկը համատեղ սերիալ են նկարահանում: Այդ մասին լրագրողների հետ հանդիպման ժամանակ տեղեկացրել է նախարար Արմեն Ամիրյանը:

«Մենք նախատեսում ենք նկարահանել սերիալ հնավայրերում իրականացվող պեղումների գործընթացի, արշավախմբի աշխատանքների վերաբերյալ: Այն կպատմի պեղումների ամբողջ ընթացքի մասին, հեռուստադիտողը հնարավորություն կունենա անձամբ տեսնելու՝ ինչ հնավայրեր բացվեցին ու ինչպիսի արժեքներ հայտնաբերվեցին: Սա, կարծում ենք, լավագույն միջոցը կլինի հանրահռչակման առումով», - նշել է գերատեսչության պատասխանատուն, հայտնում է Aysor.am-ը:

Պեղումներ կատարելու համար 2018-ի հայտարարված մրցույթում տեղ են գտել Բյուրականի Ամբերդ ամրոց-արգելոցը, Լոռի բերդն ու Նուռնուսի եկեղեցին:

Պեղումներ են իրականացվելու նաև Դվինի հնավայրում, Արտաշատ պատմական մայրաքաղաքում և մի շարք այլ հնավայրերում:

Այս հարցում նախարարությունը համագործակցում է Հնագիտության ազգագրության ինստիտուտի հետ: