Փորձագետներ. ՀՀ թուլության ամեն դրսևորում Բաքվի համար ռազմական գործողությունները սկսելու առիթ կարող է դառնալ

PanARMENIAN.Net - Հայաստանի կողմից թուլության ցանկացած դրսևորում Բաքվի համար ռազմական գործողությունները ղարաբաղյան հակամարտության գոտում վերսկսելու առիթ կարող է դառնալ: Այդ մասին ասվում է ռուսական Ռազմավարությունների և տեխնոլոգիաների կենտրոնի փորձագետների «Փոթորկին սպասելիս.Հարավային Կովկաս» զեկույցում:

Փորձագետները վերլուծել են իրավիճակը տարածաշրջանում և եկել այն եզրակացության, որ ղարաբաղյան հակամարտության սրացումն անխուսափելի է: Որպես սրացմանը նպաստող գործոններ նշվում են նավթի գների աճը, Ադրբեջանի գերազանցությունը ռազմական ոլորտում և հակամարտող կողմերի ժողովրդագրական անհավասարությունը:

Նշվում է, որ ղարաբաղյան հակամարտության առաջին տարիներից հետո մի կողմից Ադրբեջանի, մյուս կողմից ՀՀ ու ԼՂ միջև ուժերի հարաբերակցությունը պահպանվում էր, սակայն 2000-ականներին, երբ կտրուկ բարձրացան նավթի գները, իրավիճակը սկսեց փոխվել հօգուտ Արդբեջանի:

«Նավթադոլարների շնորհիվ Ադրբեջանն ավելացրեց ռազմական ծախսերն ու բանակի թվաքանակը: Եթե 2001-ին երկրի ռազմական բյուջեն $300 մլն էր, ապա 2013-ին այն կազմեց $3,7 մլրդ և հավասար էր Հայաստանի ամբողջ պետբյուջեին»,-ասվում է հոդվածում, գրում է ՌԲԿ-ն:

Հոդվածում բերվում է ՀՀ և Ադրբեջանի զինված ուժերի թվաքանակի զարգացման միտումը: 2016-ին Ադրբեջանի ԶՈւ անձնակազմը եղել է 126.000, մինչդեռ ՀՀ ԶՈւ անձնակազմը 2002-ից մինչ օրս կազմում է մոտ 45.000:

«Եթե ժողովրդագրական միտումները չփոխվեն, ապա ՀՀ բնակչությունը կարող է 2030-ին կրճատվել մինչև 3 մլն, իսկ 2050-ին ՝ մինչև 2,7 մլն: Ըստ ՄԱԿ հաշվարկների, Ադրբեջանի բնակչությունը 2030 կհասնի 10,7 մլն, իսկ 2050-ին՝ 11 մլն»,-ասվում է զեկույցում:

Ռուս փորձագետները նշում են, որ ադրբեջանական բանակի վերազինումը, որը պայմանավորված էր նավթադոլարների հոսքով, ստիպեց ՌԴ-ին քայլեր ձեռնարկել բալանսավորելու համար իրավիճակը: «2016-ի փետրվարին ՌԴ-ն Հայաստանին մոտ 200 մլն վարկ տրամադրեց սպառազինությունների գնման համար, առաքվեցին այդ թվում նաև «Սմերչ» համակարգեր և դրանց հրթիռները, «ՏՕՍ-1Ա» հրանետանային համակարգեր, ռադիոտեխնիկական հետախուզության միջոցներ, թեթև և հրաձգային զինատեսակներ և այլն»,-ասվում է հոդվածում:

Բաքուն աճող սոցիալական լարվածության կարող է բախվել, որի պատճառներից մեկը նաև ժողովրդագրական աճն է: Ըստ զեկույցի, գյուղաբնակ երիտասարդների հոսքը քաղաքներ նույնպես լուրջ ներքաղաքական ռիսկեր է պարունակում:

Հայաստանի կողմից թուլության ցանկացած դրսևորում Բաքվի համար ռազմական գործողություններ սկսելու առիթ կարող է դառնալ: Եվ եթե հարձակումը կայծակնային լինի, Բաքուն կարող է հաղթել, կարծում են փորձագետները:

Նշվում է, որ իրավական լուծման հույս դեռ չկա: «Լեռնային Ղարաբաղի միջազգային կարգավիճակի օրինականացում չի նկատվում, հայկական կողմին պարտադրված է սպառազինությունների մշտական մրցավազք Արդբեջանի հետ՝ անհամեմատելի տնտեսական և ժողովրդագրական ռեսուրսների պարագայում»,-ասվում է զեկույցում: