Պեսկով. Պուտինն ու Փաշինյանը երկկողմ հանդիպում կունենան Սոչիում

PanARMENIAN.Net - ՌԴ նախագահ Վլադիմիր Պուտինը և ՀՀ վարչապետ Նիկոլ Փաշինյանը երկկողմ հանդիպում կունենան մայիսի 14-ին Սոչիում: Այդ մասին հայտարարել է ՌԴ նախագահի մամուլի քարտուղար Դմիտրի Պեսկովը:

«Մայիսի 14-ին Սոչիում կկայանա ԵՏՄ գագաթնաժողովը, նախագահ Պուտինը երկկողմ հանդիպումներ կունենան, այդ թվում ՀՀ վարչապետ Փաշինյանի, Ղրղզստանի նախագահ և Բելառուսի նախագահ Լուկաշենկոյի հետ, ինչպես նաև Ղազախստանի նախագահ Նուրսուլթան Նազարբաևի հետ: Օրակարգը բավականին լարված է»,-ասել է Պեսկովը, հայտնում է ՌԻԱ Նովոստին:

ՀՀ կառավարության մայիսի 11-ի նիստում փոփոխություն է կատարվել ԵՏՄ մասին պայմանագրում: ՀՀ արտաքին գործերի նախարարի պաշտոնակատար Էդվարդ Նալբանդյանը ներկայացրել է «Եվրասիական տնտեսական միության մասին» 2014 թվականի մայիսի 29-ի պայմանագրում փոփոխություն կատարելու մասին» արձանագրությունը վավերացնելու մասին» ՀՀ օրենքի նախագծի մասին նախագիծը:

«Նպատակն է ապահովել Եվրասիական տնտեսական միության բարձրագույն խորհրդի կազմում վարչապետի մակարդակով ներկայացված լինելու հնարավորությունը», - ասել է Նալբանդյանը: