Մայր աթոռ Սուրբ Էջմիածինն անդրադարձել է մայիսի 16-ին Սևանի թերակղզու մուտքի մոտ տեղի ունեցած բողոքի ցույցի ժամանակ Հայ եկեղեցու և Մայր աթոռի հասցեին հնչած մեղադրանքներին:
Մայր աթոռը պարզաբանում է, որ ժամանակին Սևանի Վազգենյան հոգևոր դպրանոցից մինչև լողափ ընկած աջակողմյան հատվածը ՀՀ կառավարության որոշմամբ սեփականության իրավունքով հատկացվել է դպրանոցին և հետագայում ՀՀ կառավարության պահանջի հիման վրա Մայր աթոռ Սուրբ Էջմիածնի կողմից այն տրամադրվել է նախագահական հանգստավայրին` իբրև անվտանգության գոտի և անցակետ:
«Ինչ վերաբերում է ձախակողմյան հատվածում գտնվող ավտոկանգառին, այն Եկեղեցու կողմից ձեռք է բերվել ռեստորանի շենքի հետ մեկտեղ, որը ծառայում էր իբրև ճեմարանականների ճաշարան: Ավտոկանգառը Եկեղեցու կողմից ծառայեցվում է Ս. Առաքելոց վանք և դպրանոց այցելուների համար, սակայն այնտեղ ապօրինաբար հաստատված անհատ վաճառականների տաղավարները որևէ առնչություն չունեն Եկեղեցու հետ, և այդ խառնաշփոթը կարգավորելու բոլոր ջանքերն առ այսօր որևէ արդյունք չեն տվել»,-ասվում է Մայր աթռի տարածած հայտարարության մեջ:
Մայիսի 16-ին Սևանի թերակզղի տանող ճանապարհը փակել էին բողոքի ցույցի մասնակիցները: Նրանք պահանջում էին իրենց վերադարձնել նախկինում իրենց կողմից վարձակալվող տարածքները, որոնք, ըստ ցուցարարների, ժամանակին փոխանցվել են ՀԱԵ-ին:
