Վարչապետ. Պուտինի հետ խոսել ենք գործակցության խորացման մասին, այդ թվում՝ ռազմատեխնիկական

PanARMENIAN.Net - Մայիսի 14-ին Սոչի կատարած այցի շրջանակում ՌԴ նախագահի հետ քննարկվել է հայ-ռուսական հարաբերությունների զարգացումն ու խորացումը բոլոր ուղղություններով: Այդ մասին Ազգային ժողովում հայտարարել է ՀՀ վարչապետ Նիկոլ Փաշինյանը:

«ՌԴ նախագահ Վլադիմիր Պուտինի հետ Սոչիում հանդիպման ժամանակ խոսել ենք հայ-ռուսական հարաբերությունների հետագա խորացման, զարգացման անհրաժեշտության մասին: Բոլոր ուղղություններով, այդ թվում` ռազմատեխնիկական», - ասել է Փաշինյանը` հավելելով, որ հուսով է, որ այդ համագործակցությունը գնալով ավելի ու ավելի արդյունավետ կլինի:

Նա նշել է նաև, որ Հայաստանի և Ռուսաստանի իշխանությունների միջև փոխադարձ վստահության որոշակի նախնական մթնոլորտ կա, որը հետագայում էլ ավելի կխորանա:

Անդրադառնալով այն հաղորդագրություններին, որ ՀՀ զինված ուժերը համալրվելու են ռուսական արտադրության «Տոռ» զենիթահրթիռային համակարգերով՝ վարչապետն ասել է, որ ԶՈւ կարիքները, այդ թվում ռազմատեխնիկական, կառավարության ուշադրության կենտրոնում են:

Հայաստանի հակաօդային պաշտպանությունը «Տոռ» զենիթահրթիռային համակարգերով կհամալրվի։ Այս մասին հայտնի է դարձել պաշտպանության նախարարության «Զինուժ» ծրագրից։ Համակարգերը կընդգրկվեն ԶՈՒ կազմում մի քանի ամսվա ընթացքում։