Ֆրանկոֆոնիայի գագաթնաժողովի նախապատրաստման հանձնաժողովը կգլխավորի Նիկոլ Փաշինյանը

PanARMENIAN.Net - Վարչապետ Նիկոլ Փաշինյանը որոշում է ստորագրել Ֆրանկոֆոն պետությունների և կառավարությունների ղեկավարների 17-րդ գագաթնաժողովի նախապատրաստման և անցկացման միջգերատեսչական հանձնաժողով ստեղծելու մասին: Որպես նախագահ հանձնաժողովը կղեկավարի վարչապետը:

«Հիմք ընդունելով «Կառավարության կառուցվածքի և գործունեության մասին» Հայաստանի Հանրապետության օրենքի 7-րդ հոդվածի 16-րդ մասը՝ 2018-ին ՀՀ-ում Ֆրանկոֆոն պետությունների և կառավարությունների ղեկավարների 17-րդ գագաթնաժողովի նախապատրաստման և անցկացման աշխատանքները կազմակերպելու նպատակով՝ ստեղծել Ֆրանկոֆոն պետությունների և կառավարությունների ղեկավարների 17-րդ գագաթնաժողովի նախապատրաստման և անցկացման միջգերատեսչական հանձնաժողով և հաստատել հանձնաժողովի անհատական կազմը՝ համաձայն հավելվածի»,-ասվում է որոշման մեջ։

Նշվում է, որ հանձնաժողովը պետք է մեկամսյա պարբերականությամբ վարչապետին զեկուցի Ֆրանկոֆոն պետությունների և կառավարությունների ղեկավարների 17-րդ գագաթնաժողովի նախապատրաստման աշխատանքների ընթացքի մասին:

Հանձնաժողովի անհատական կազմում կլինեն Նիկոլ Փաշինյանը՝ որպես նախագահ, ՀՀ փոխվարչապետ Տիգրան Ավինյանը, ԱԳ նախարար Զոհրաբ Մնացականյանը՝ որպես հանձնաժողովի նախագահի տեղակալ, առողջապահության նախարար Արսեն Թորոսյանը, ԱԻ նախարար Հրաչյա Ռոստոմյանը, ինչպես նաև ԿԳ, մշակույթի, տնտեսական զարգացման և ներդրումների, տրանսպորտի, կապի և տեղեկատվական տեխնոլոգիաների, սպորտի և երիտասարդության հարցերի, Ֆինանսների նախարարները, ԱԱԾ տնօրենը, ՀՀ ոստիկանապետը, Քաղավիացիայի նախագահը, Երևանի քաղաքապետի առաջին տեղակալ, քաղաքապետի պաշտոնակատար Կամո Արեյանն ու ԱԳՆ գլխավոր քարտուղարը:

Ավելի վաղ հաստատվել են գագաթնաժողովի լոգոն, կարգախոսը՝ «Ապրել միասին», մշակվել է հատուկ վեբ-կայք:

Ֆրանկոֆոնիայի գագաթնաժողովն անցկացվելու է Երևանում 2018-ի հոկտեմբերի 11-12-ին: Նախատեսվում է ավելի քան 50 երկրի ղեկավարի և 100 բարձրաստիճան պատվիրակության մասնակցություն:Երկօրյա գագաթնաժողովի մեկնարկից երեք օր առաջ կայանալու է արտգործնախարարների համաժողովը, որին կնախորդի նաև մշտական խորհրդի նիստը: Միջոցառման շրջանակում անցկացվելիք տնտեսական գործարար ֆորումին ակնկալվում է ֆրանկոֆոն երկրների ընկերությունների և ձեռնարկությունների լայն ներկայացվածություն